МУГТ Б.Сэр-Од Бостоны марафоны элит ангилалд оролцох анхны монгол тамирчин боллоо

Дэлхийн хамгийн эртний бөгөөд нэр хүндтэй зургаан марафоны нэг болох 130 дахь удаагийн "Бостоны марафон" дөрөвдүгээр сарын 20-нд АНУ-д болно. Тус тэмцээний зохион байгуулах хорооноос (B.A.A) дэлхийн шилдэг тамирчдын жагсаалтыг албан ёсоор зарласан бөгөөд үүнд Монгол Улсын гавьяат тамирчин Б.Сэр-Од багтжээ.

Ингэснээр Б.Сэр-Од Бостоны марафоны түүхэнд мэргэжлийн тамирчдын "Professional Field" буюу элит ангилалд уригдсан анхны монгол тамирчин болж, спортын түүхэнд шинэ хуудас нээж байна. Энэ жилийн марафонд 130 гаруй орны 30 мянга гаруй гүйгч оролцохоос зохион байгуулагчид зөвхөн олимпын медальтан, дэлхийн аварга болон топ чансаатай 50 орчим тамирчныг л энэхүү тусгай ангилалд сонгон оролцуулж байгаа юм.

Манай тамирчин өнгөрсөн онд Нью-Йоркийн марафоны элит ангилалд мөн уригдан хурд сорьж байсан бол энэ удаад дэлхийн марафон гүйлтийн хамгийн өндөр босготой Бостоны замын шилдэг гүйгчдийн нэгээр сонгогдлоо. Б.Сэр-Од нь Олимпын наадамд зургаа, ДАШТ-д 12 удаа тасралтгүй оролцсон дэлхийн цорын ганц марафонч гэдгээрээ олон улсад хүлээн зөвшөөрөгдсөн юм.