ARC брэнд iPhone-д зориулсан “Damascus Opal Arc Pulse” хэмээх дээд зэрэглэлийн кейсээ танилцууллаа. Энэхүү загвар нь массын зах зээлд зориулагдаагүй бөгөөд ердөө 100 ширхэг үйлдвэрлэгдсэн тул утасны кейс гэхээс илүү үнэ бүхий аксессуар болж байна. ARC брэндийн уг загвар нь утсыг далдлах биш, харин үндсэн өнгө, материал, инженерчлэлийг нь илүү тодруулж харуулах зорилготой ажээ.
Бусад энгийн кейсээс ялгарах онцлог нь юу вэ?
Кейсийн хийц нь дамаск титаны нэгэн цул блокоос гарган авсан CNC технологиор боловсруулагдсан бөгөөд опал өнгийн дулааны оксиджуулалт нь кейс бүрийг давтагдашгүй хээ, өнгө төрхтэй болгожээ. Иймд энэхүү дахин давтагдашгүй цор ганц загварууд нь үйлдвэрийн бүтээгдэхүүн гэхээс илүү гар урлалын бүтээл хэмээн нэрлэгдэж алдартай урчуудын бүтээлтэй дүйцэхүйц хэмжээнд үнэлэгдээд буй.
Damascus Opal Arc Pulse нь минимал хэлбэрээ хадгалсан, доргилт, уналтад тэсвэртэй дотоод давхаргатай бөгөөд камер болон ирмэгийн хэсгийг онцгойлон хамгаалсан 360° хамгаалалтын бүтэцтэй. Утасны дөрвөн өнцгийг хамгаалснаас өөр илүү хийц байхгүй тул iPhone-ийн дизайн, пропорцыг алдагдуулахгүй давуу талтай юм.
Албан ёсны сайт дээрээ 1,600$ буюу ойролцоогоор 5,811,000₮ худалдаалагдаж буй уг загварын талаар ARC брэнд хэлэхдээ “худалдаж авах эсэх нь хувь хүний сонголт учраас үнэ тийм ч чухал биш байх” гэжээ. Тэгвэл та энэ кейсийг авах байсан уу?
Эх сурвалж: arc.cc
