Улаанбаатар хотод орон сууц түрээсийн дундаж үнэ өмнөх сартай харьцуулахад буурсан үзүүлэлт ажиглагджээ. Тэр дундаа 3 өрөө орон сууцны түрээсийн үнэ 2026 он гарснаас хойш хамгийн их дүнгээр буюу 230 мянган төгрөгөөр буурсан байна. Энэ нь өрхийн нэг сард хэрэглэх тог цахилгааны мөнгө, хүүхдийн цэцэрлэгийн дундаж төлбөртэй тэнцэх хэмжээний өөрчлөлт болж байгаа юм.
Харин хоёр өрөө байрны түрээс мөн үеэс 0,06 сая буюу 60 мянга орчим төгрөгөөр хямдарсан ажээ. Өнгөрөгч дөрөвдүгээр сарын байдлаар 1 өрөө байр хөлслөх дундаж өртөг 1.27 сая төгрөг, 2 өрөө байр 1.81 сая төгрөг, 3 өрөө байр 2.78 сая төгрөгийн үнэтэй байна.
Мөн Улаанбаатар хотын 6 дүүргийн 18 байршлын үнийн мэдээллийг нэгтгэж орон сууц түрээслэх дундаж өртгийг Үндэсний статистик хороо тогтоожээ. Тус мэдээллээс үзэхэд Сүхбаатарын талбай, 220 мянгат, Зайсан цогцолбор, River garden хотхон зэрэг байршилд орон сууц хөлслөх өртөг хамгийн өндөрт тооцогдож байгаа юм байна.
Эх сурвалж: Үндэсний статистикийн хороо
Сэтгүүлч Б.Нарангэрэл
Сэтгэгдэл