Хайртай хүнийхээ гараас атгах үед хүний биед өвдөлт намдаах эмтэй ижил нөлөө үзүүлдэг болохыг судалгаагаар тогтоожээ. Учир нь хосууд гар гараа барилцах мэдрэмж нь тэдний тархины долгион болон зүрхний цохилтыг нэгэн хэмнэлд оруулдаг байна.
Голдштейн тэргүүтэй эрдэмтдийн 2018 онд хийсэн “Brain-to-brain coupling during handholding is associated with pain reduction" судалгаагаар эмэгтэй хүн өвдөлт мэдэрч байх үед хайртай залуу нь гарыг нь барихад хосуудын тархины идэвхжил синхрончлогдож, улмаар өвдөлт мэдрэх түвшин мэдэгдэхүйц буурдаг болохыг баталсан байна. Энэхүү тархины долгионы ижилсэл нь өвдөлтийн дохиог сааруулах биологийн үндэс суурь болдог ажээ.
Туршилтаар хосууд гар барилцахгүй, бие махбодын хүрэлцэх холбоо үүсгээгүй тохиолдолд дээрх синхрончлол үүсдэггүй бөгөөд өвдөлт намдах нөлөө ажиглагдаагүй байна. Үүнээс үзэхэд хайртай хүнийхээ гарыг атгах нь сэтгэл зүйн дэмжлэг болохоос гадна төв мэдрэлийн системд өвдөлт намдаах дохио ажээ.
