Passion in the City: Төв талбайн гацуур
Шинэ он солигдох мөчид бид өнгөрсөн нэг жилийн хугацаанд юу хийж бүтээснээ, юунаас суралцсанаа эргэн харж, цаашид юуг зорихоо тодорхойлдог билээ. Иймд бид өөр өөр нас, мэргэжил, амьдралын өвөрмөц замналтай хүмүүсийн дотоод эргэцүүлэл, чин хүсэл тэмүүллийг илтгэх “Passion in the City” цувралын тавдугаар дугаарыг талбайн гацуураас хүргэж байна. Хотын хэмнэл дунд орших эдгээр хүмүүсийн түүх, ухаарал нь шинэ оноо угтаж буй танд урам зориг өгч, дараагийн алхмаа эргэлзэлгүйгээр итгэлтэй хийхэд хөтөч болно гэдэгт итгэлтэй байна. Шинэ жилийн мэнд хүргэе!
Багш А.Галхүү
Хобби: Дугуй унах
2025 онд таны хувьд хамгийн үнэ цэнтэй ололт юу байв?
Энэ жил миний хувьд шинэ ажилд орж, мэргэжлийн орчноо тэлсэн нь онцлох ололт байлаа. Үүний зэрэгцээ өвлийн өвгөний дүрд анх удаа ажиллаж үзсэн нь өөрийгөө шинэ орчин, шинэ туршлагаар сорьж, өөр нэгэн талаас нээсэн утга учиртай амжилт болсон.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би аливаа нөхцөл байдалд хэт баригдалгүйгээр, дотроо төрж буй бодол, мэдрэмжээ нуухгүй, зөв зохистой байдлаар илэрхийлж сурах нь хувь хүний төлөвшилд чухал ач холбогдолтойг ойлгож авсан.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Хүний хүсэл тэмүүлэл, мөрөөдөл хязгааргүй байдаг бөгөөд өөрийн чаддаг, сонирхдог зүйлсийг хойш тавилгүйгээр хэрэгжүүлэх нь хамгийн чухал гэж би боддог. Дуртай зүйлдээ тууштай хичээж, өөрийн боломжийг бодитоор ашиглаж чадсан тэр мөч бүрээс л миний дотоод хүсэл тэмүүлэл улам бүр нэмэгддэг гэж бодож байна.
Аудитор Ч.Даваабаяр
Хобби: Дуу сонсох
2025 онд таны хувьд хамгийн үнэ цэнтэй ололт юу байв?
Энэ жилийн миний хувьд хамгийн үнэ цэнтэй ололт нь сэтгэл зүйн болон амьдралын хувьд чухал нөлөөтэй, хайртай хүнтэйгээ учирсан явдал байлаа.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би аливаа зорилго, хийхээр төлөвлөсөн ажлуудаа хойшлуулалгүй, цаг хугацаанд нь хэрэгжүүлэх нь үр дүнд хүрэхэд онцгой ач холбогдолтойг ойлгож авсан нь чухал сургамж болсон.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирэх жил би сурч боловсрох, өөрийгөө хөгжүүлэх үйл явцад илүү төвлөрч, шинээр олж авсан мэдлэг чадварынхаа бодит үр шимийг мэдрэх замаар дотоод хүсэл тэмүүллээ улам гүнзгийрүүлэн тэтгэхийг зорьж байна.
Зэвсэгт хүчний 029 ангийн байлдагч Б.Жамъянпүрэв
Хобби: E sport
2025 онд таны хувьд хамгийн үнэ цэнтэй ололт юу байв?
Энэ жил миний хувьд өөрийн дотоод мөн чанар, үнэт зүйлсээ илүү тодорхойгоор танин мэдсэн нь хувь хүний хөгжлийн түвшинд хүрсэн хамгийн том ололт байлаа.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би цэргийн албанд татагдан үүргээ гүйцэтгэх явцдаа өөрийгөө өмнө нь хангалттай хөдөлмөрлөж, тасралтгүй суралцаж байсан гэж боддог байснаа дахин эргэцүүлэн харсан. Энэ орчинд байхдаа хүн өдөр бүр, нөхцөл байдал бүрээсээ суралцаж, өөрийгөө хөгжүүлэх боломжтойг бодитоор ойлгосон нь чухал сургамж болсон.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирэх жил цэргийн албаа амжилттай хааж дуусган, энгийн амьдралдаа эргэн орсны дараа хайртай хүнтэйгээ хамт өнгөрүүлэх цаг хугацааг илүү үнэ цэнтэйгээр мэдэрч, хамтын мөч бүрээс урам зориг, хүсэл тэмүүлэл авахыг хүсэж байна.
Их эмч Г.Пүрэвдулам
Хобби: Дартс тоглох
2025 онд таны хувьд хамгийн үнэ цэнтэй ололт юу байв?
Энэ жил миний хувьд шинэ ажилд орж, шинэ хамт олонтой болсон нь мэргэжлийн орчиндоо өөрчлөлт хийж чадсан чухал ололт байлаа. Үүний зэрэгцээ Монгол орноороо болон гадаадын улс орнуудаар аялсан туршлага маань хувь хүний хөгжил талаасаа мөн үнэ цэнтэй амжилт болсон.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би өөрийгөө илүү ихээр дайчлан ажиллах, шинэ мэдлэг чадварт суралцах замаар өөрийн боломжийг тэлж, өмнө нь анзаараагүй байсан чадвар, нөөц бололцоогоо шинээр нээх боломжтойг ойлгож авсан.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирэх жил би шинэ зүйлсийг зоригтойгоор туршиж, одоо хийж буй ажлуудаа илүү чанартай, үр дүнтэй гүйцэтгэж сурахыг хүсэж байна. Өөрийн гаргасан ахиц дэвшлийг бодитоор харж, өөртөө итгэх итгэлээ бэхжүүлэх нь миний дотоод хүсэл тэмүүллийг нэмэгдүүлэх гол хүчин зүйл болно гэж бодож байна.
Сурагч Д.Нямбаяр
Хобби: Хоол хийх
2025 онд таны хувьд хамгийн үнэ цэнтэй ололт юу байв?
Энэ жилийн хувьд миний хамгийн чухал ололт нь солонгос хэлийг тууштай суралцсаны үр дүнд TOPIK-ийн шалгалтаас шаардлагатай оноогоо авч чадсан явдал байлаа. Төгсөөд Бүгд Найрамдах Солонгос Улсад суралцах зорилготой тул энэ амжилт маань цаашдын боловсролын замналд минь бодитой суурь болсон ач холбогдолтой үр дүн юм.
Харин энэ жил танд хамгийн их ухаарал, сургамж өгсөн зүйл юу байсан бэ?
Төгсөх ангийн сурагчийн хувьд энэ жил би хичээл сургалтад илүү хариуцлагатай хандаж, өмнөх үеэсээ илүү их анхаарал, хүчин чармайлт гаргах шаардлагатайг ухамсарласан нь чухал сургамж болж үлдлээ.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирээдүйд суралцаж төгсөх мэргэжлээрээ амжилттай ажиллаж буй хүмүүсийн туршлага, тэдний бүтээсэн бодит үр дүнг ажиглах нь миний хувьд урам зоригийн чухал эх сурвалж болдог. Энэ мэдрэмжээ ирэх жил илүү хөгжүүлж, өөрийн хүсэл тэмүүллийг улам бататгахыг хүсэж байна.
Эмч Б.Сугар
Хобби: Гар урлал
2025 онд таны хувьд хамгийн үнэ цэнтэй ололт юу байв?
Энэ жил миний хувьд мастерын судалгааны ажлаа бүрэн гүйцэтгэж, түүнтэй уялдсан лабораторийн туршилтуудыг амжилттай хийж дуусгасан нь мэргэжлийн хувьд бодит үр дүнд хүрсэн чухал ололт байлаа.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ жилийн хугацаанд би ажил мэргэжлийн амжилтаас гадна гэр бүл, хайртай хүмүүстэйгээ хамт өнгөрүүлэх цаг хугацаа хүний сэтгэл зүй, амьдралын тэнцвэрт байдалд онцгой ач холбогдолтой болохыг гүнзгий ойлгож авсан.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирэх жил миний хувьд мастерын судалгааны ажлаа эцэслэн дуусгах чухал үе тохионо. Үүний дараа Монголынхоо байгалийн дурсгалт, үзэсгэлэнт газруудаар аялж, орчноосоо урам зориг авч, өөрийн дотоод хүсэл тэмүүллийг илүү гүнзгийрүүлэхийг зорьж байна.
Цахилгаанчин Б.Батмөнх
Хобби: Кино үзэх
2025 онд таны хувьд хамгийн үнэ цэнтэй ололт юу байв?
Энэ жил миний хувьд ахиц дэвшлийн хэмжээ их багаас үл хамааран өөрийн мэдлэг, ур чадварыг дараагийн түвшинд хүргэж чадсан нь хувь хүний хөгжлийн чухал ололт байлаа.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би өмнө нь өөрийн боломж, нөөц бололцоогоо бүрэн дайчлан ажилладаггүй байснаа ухамсарлаж, цаашид илүү их хичээл зүтгэл, тууштай байдлаар зорилгодоо хандах шаардлагатайг ойлгосон нь бодит сургамж болсон.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Энэ жил гадаадын хэд хэдэн орноор аялсан туршлага маань шинэ санаа, дараагийн зорилгоо тодорхойлоход урам зориг өгсөн. Тийм болохоор ирэх жил Япон Улсад аялж, тэндээс соёл, орчин, амьдралын хэмнэлээс сургамжтай ойлголтуудыг авч, тэдгээрийг өөрийн хөгжилд уялдуулах замаар дотоод хүсэл тэмүүллээ улам нэмэгдүүлэхийг зорьж байна.
СЭЗИС-ийн оюутан А.Индра
Хобби: Бүжиглэх
2025 онд таны хувьд хамгийн үнэ цэнтэй ололт юу байв?
Энэ жил би оюутан болж, сонгон суралцаж буй мэргэжлийнхээ чиглэлээр зохион байгуулагдсан олимпиадад амжилттай оролцон тэргүүн байр эзэлсэн нь суралцах үйл явцдаа бодит үр дүнд хүрсэн чухал ололт байлаа.
Харин энэ жил танд хамгийн их ухаарал, сургамж өгсөн зүйл юу байсан бэ?
Энэ хугацаанд би өдөр тутмын амьдралдаа дэргэд минь байж, дэмжиж ирсэн хүмүүсийн үнэ цэнийг илүү гүнзгий ухамсарлаж, тэдэндээ анхаарал халамж, хайр хүндэтгэлийг илүү ихээр илэрхийлэх шаардлагатайг ойлгож авсан.
Ирэх жил юунд төвлөрч, юунаас илүү их хүсэл тэмүүлэл мэдрэхийг хүсэж байна вэ?
Ирэх жил Америкийн Нэгдсэн Улсад аялахаар төлөвлөж байгаа бөгөөд энэхүү аялал нь шинэ орчин, соёлтой танилцаж, олон төрлийн мэдлэг, туршлага хуримтлуулах боломж олгоно гэж бодож байна.
