АНУ-ын Аляска мужийн Фэйрбэнкс хотноо энэ сарын 16-ны өдөр эхэлсэн Дэлхийн мөсөн урлалын аварга шалгаруулах "Ice Alaska 2026 - World Ice Art Championship" тэмцээнд Монгол улсаа төлөөлөн оролцсон баг тамирчид амжилттай оролцож, дэд байрт шалгарлаа.
Монголын баг энэ удаагийн тэмцээнд байгаль дэлхийн сэргэлтийг дүрсэлсэн "Everything is Waking Up" хэмээх өвөрмөц шийдэлтэй бүтээлээрээ өрсөлдсөн юм. Тус багийг олон улсын тэмцээний арвин туршлагатай уран сийлбэрчин Ц.Батмөнх ахалж, бүрэлдэхүүнд нь сийлбэрчин Х.Алтанхүү, Д.Энхбат, Д.Мөнхтуул нар ажиллажээ.
1990-ээд оноос эхлэлтэй "Ice Alaska" олон улсын наадам нь дэлхийн өнцөг булан бүрээс шилдэг мастеруудыг цуглуулдаг бөгөөд 2021 оноос эхлэн шинэчилсэн зохион байгуулалттайгаар жил бүр уламжлал болгон зохиогдож буйгаараа онцлог.
Монголын уран сийлбэрчид сүүлийн 20 гаруй жилийн турш тус тэмцээнд тогтмол оролцож, өөрсдийн дахин давтагдашгүй арга барил, үндэсний хэв шинжийг шингээсэн бүтээлүүдээрээ дэлхийд танигдаад байгаа юм. Манай улсын баг тамирчид өмнөх жилүүдэд ч мөн тэргүүн болон тусгай байруудыг удаа дараа хүртэж байсан амжилттай.
