“PGL Bucharest 2026“ тэмцээнд The MongolZ гуравдугаар байр эзэлж онооны үзүүлэлтийг Techno тэргүүллээ

Румын улсын Бухарэст хотноо зохион байгуулагдсан CS2-ын хоёрдугаар зэрэглэлийн “PGL Bucharest 2026“ тэмцээнд манай улсын The MongolZ баг өрсөлдөгч баг болох Францын 3DMAX-ийг 2:0-ээр хожиж илт давуу ялалт байгуулснаар PGL Bucharest 2026 тэмцээний хүрэл медалийг хүртлээ. Гуравдугаар байрны төлөөх тоглолт финалд шалгарахаар өрсөлдсөн Astralis болон FUT багуудын тоглолтоос ч өмнө шийдэгдэж The MongolZ баг шагналын тавцанд зогсох эрхээ баталгаажуулсан байна.

“PGL Bucharest 2026“ тэмцээн нь 1.2 сая ам.долларын шагналын сантай бөгөөд багууд олон улсын чансаагаа дээшлүүлж том тэмцээнүүдэд оролцох эрхээ баталгаажуулах, шинэ баг бүрэлдэхүүн тактикаа турших боломжтой чухал тэмцээнүүдийн нэг ажээ. Энэхүү тэмцээнд The MongolZ баг шөвгийн наймд ОХУ-ын "PARIVISION" багийг 2:1-ийн харьцаатай хожсон бол шөвгийн дөрөвт "FUT Esports" багт 0:2-оор хожигдсон юм. Гэвч хүрэл медалийн төлөө тоглон The MongolZ-ийн тамирчид 26 үе авч гуравдугаар байр эзэлснээр 150,000 ам.долларын шагнал авч тус тоглолтод "Techno" буюу М.Содбаяр 1.86 рейтингтэйгээр багаа тэргүүлжээ. 

Олон улсын И-спорт сонирхогчид тоглолтын турш The MongolZ баг илүүрхэж 3DMAX баг бүх талаараа дутуу байсан хэмээн үзэхээс гадна The MongolZ анхны финалд шалгарах боломжоо алдсанд харамсаж буйгаа илэрхийлээд буй. The MongolZ-ийн дараагийн томоохон тэмцээн нь ирэх тавдугаар сарын 7-нд Казахстан улсад зохиогдох "PGL Astana 2026" болж байгаа аж.