Хүний бие махбод долоо хоногийн турш биологийн тодорхой мөчлөгөөр ажилладаг байна. Тухайлбал, даваа гарагийн өглөө амралтын тайван байдлаас ачаалалд шилжих үед цусны даралт долоо хоногийн бусад өдрүүдээс хамгийн өндөр түвшинд хүрч, стрессийн даавар эрчимтэй ялгардаг аж. Лхагва гараг гэхэд ажлын стресс, ядаргаа хуримтлагдаж, амралт хол санагддаг тул сэтгэл зүйн хувьд хамгийн урт бөгөөд хүнд өдөр мэт мэдрэгддэг байна.
Харин баасан гарагийн үдээс хойш энэ байдал өөрчлөгдөж, стрессийн даавар болох кортизолын түвшин эрс буурдгийг судалгаагаар тогтоожээ. Шинжлэх ухаанд үүнийг "Weekend effect" буюу амралтын өдрүүдийн нөлөө гэж нэрлэдэг бөгөөд бие махбод ажлын ачааллаас салж, нөхөн сэргээх горимд шилждэг байна. Энэхүү аз жаргалын гол нууц нь бодит амралт гэхээсээ илүү түүнийг угтсан хүлээлт юм. Нью-Йоркийн их сургуулийн эрдэмтдийн тогтоосноор хүн амралтын өдрүүдэд амарч байх үеэсээ илүү баасан гарагт "амралт болох гэж байна" гэж төсөөлөхдөө хамгийн их таашаал авдаг аж.
Учир нь тархи ирээдүйд болох таатай төлөвлөгөөг бодмогц аз жаргалын гормон ялгаруулж, хуримтлагдсан ядаргааг мартагдуулдаг байна. Үүний зэрэгцээ баасан гарагт бусдын заавар, зөвлөгөөгөөр биш өөрийнхөө цаг хугацааг эзэмших эрх чөлөө ойртдог нь сэтгэл ханамжийг 30% хүртэл өсгөдөг аж. Тиймээс энэ өдөр ажлын эрч хүч бага зэрэг саарч, хамт олонтойгоо яриа өрнүүлэх нь ирэх долоо хоногт шаардлагатай эрч хүчээ нөхөж буй хэрэг юм.
