Өнгөрсөн аравдугаар сарын 15-нд цацагдсан Өмнөд Солонгосын дуучин Хваса (화사)-гийн хоёр дахь синглэ албум болох “Good Goodbye” дуу нь хөгжмийн чартуудад дараалан тэргүүлж, “Perfect All Kill” амжилтыг үзүүллээ. Солонгос улсад K-POP хөгжмийн нэвтрүүлэг, чартуудад зэрэг тэргүүлсэн дууг PAK буюу Perfect All Kill гэж нэрлэдэг билээ. Анх 2019 онд соло уран бүтээлээ эхлүүлснээс хойш анх удаагаа Хойд Америк болон Европын орнуудаар аялан тоглолтоо хийсэн Хвасагийн хувьд энэхүү дуу нь удаан хугацааны дараах эргэн ирэлт нь болж байгаа юм.
Олон нийт “Good Goodbye” дууны клипийг 1965 оны Францын “Pierrot le Fou” киног санагдуулам хийц, өнгө аястай хэмээн онцолж, мөн жүжигчин Пак Жон Минтэй хамтран тоглосон нь илүү шинэлэг байсан хэмээн үнэлж байгаа ажээ. Хваса энэхүү дууныхаа үгийг харьяалагддаг P-Nation компанийн уран бүтээлч Ан Шин Этэй хамтран бичсэн бөгөөд Ан Шин Э цахим хуудсандаа “Миний дотор оршин байгаа ‘баяртай’ ч гэж хэлж чадаагүй явуулсан бүх салах ёсыг энэ дуу эдгээж өгөх шиг санагдсан. Бас энэ мэдрэмжийг клипээрээ гайхалтай илэрхийлсэн гэж бодож байна” хэмээн сэтгэгдлээ хуваалцсан байна.
Хваса сүүлд оролцсон нэгэн нэвтрүүлгийнхээ үеэр яагаад заавал жүжигчин Пак Жон Минийг уг дууны клипэнд тоглуулсан талаараа хэлэхдээ “Би 2010 онд нээлтээ хийж байсан “Bleak Night” киноноос хойш фэн нь явсан юм. Найзууд маань тэр үед И Жэ Хүнд их дуртай байсан ч, яагаад ч юм Пак Жон Мин л нүдэнд тусаад байсан...” гэжээ. “Blue Dragon Film Awards-2025” дээрх тусгай үзүүлбэрийн дараа “Good Goodbye” дуу нь Солонгостоо төдийгүй дэлхийн хөгжмийн платформуудын хайлтыг тэргүүлж эхэлсэн ба жүжигчин Пак Жон Мин үзэгчийн суудлаас тайз руу гарч хамтдаа үзүүлбэр үзүүлсэн нь олон нийтийг гайхшируулсан юм. Ийнхүү “Good Goodbye” дуу дахин олны анхааралд өртөж, чартуудын нэгт бичигдсэн байна.
