Монголын язгуур өв соёл, үндэстэн угсаатны зан заншлыг сурталчлах “Нүүдэлчин” дэлхийн соёлын фестиваль тав дахь жилдээ Налайхын Тайж хайрханы бэлд наймдугаар сарын 21-23-нд зохион байгуулагдах гэж байна.

Засгийн газрын тогтоолоор “Монголд зочлох жил”-ийн хүрээнд анх санаачилсан уг арга хэмжээ өдгөө олон улсын цар хүрээтэй брэнд фестиваль болон өргөжжээ. Энэ жилийн хувьд байгаль, уур амьсгалын өөрчлөлттэй зохицон амьдрах нүүдэлчдийн уламжлалт арга ухааныг түгээн дэлгэрүүлэхэд голчлон анхаарч буй аж.

Энэ удаагийн фестиваль олон улсын эрдэм шинжилгээний хурал, үндэсний үйлдвэрлэгчдийн үзэсгэлэн худалдаа, соёлын биет бус өвийг сурталчлах отгуудын нэгдсэн хөтөлбөрөөр өргөн хүрээнд үргэлжлэх юм. Тухайлбал, орон орны болон аймаг, нийслэлийн отгууд өөрсдийн язгуур урлаг, гар урлал, ахуй соёлоо биет байдлаар толилуулж, өвлөн уламжлагчид туршлага солилцох “Соёлын өвийн өртөө” ажиллах юм байна.

Түүнчлэн хүчит бөхийн барилдаан, үндэсний сур болон шагайн харваа, морьт харваа, уран уургач, бугуйлчдын тэмцээн зэрэг уламжлалт спортын төрлүүд гурван өдрийн турш үргэлжлэх аж. Зочид, жуулчдад зориулж Сүхбаатарын талбайгаас фестивалийн байршил руу үнэ төлбөргүй автобус үйлчлэхээр төлөвлөжээ.