Өвлийн улиралд иргэдийн чөлөөт цагийг зөв боловсон өнгөрүүлэх, хүүхэд багачуудад гадаа тоглох таатай орчныг бүрдүүлэх зорилгоор нийслэлийн зургаан дүүрэгт мөсөн гулгуурын талбай, мөсөн хотхонуудыг байгуулжээ. Энэ хүрээнд Төв цэнгэлдэх хүрээлэнд “Мөрөөдлийн мөсөн цэнгэлдэх-2025” мөсөн хотхон ажиллаж байна.
Тус хотхон нь Улаанбаатар хотод задгай талбайд байгуулагдсан хамгийн том мөсөн гулгалтын талбайд тооцогдож байгаа бөгөөд хүүхэд багачуудад зориулсан цасан уул, чарганы бүс, иргэд амрах тохилог орчин, халуун ундаа, үйлчилгээний цэгүүд, бүрэн гэрэлтүүлэг бүхий чөлөөт цагийн талбайг цогцоор нь шийдсэнээрээ онцлог аж.
Мөн уг талбайд зориулан мөс өнгөлөгч машиныг оруулахаар бэлтгэж байгаа бөгөөд Төв цэнгэлдэх хүрээлэн нь нийслэлийн өмч учраас жилийн дөрвөн улиралд иргэдийн хэрэгцээнд нийцүүлэн ашиглах боломж бүрдэж байгааг албаныхан онцолж байна.