Улаанбаатар Марафон олон улсын гүйлтийг 2014 оноос эхлэн жил бүрийн тавдугаар сард уламжлал болгон зохион байгуулдаг болсон. Тэгвэл энэ жил тавдугаар сарын 23-ны өдөр зохион байгуулагдах гэж байна. Гүйлтийн бүртгэл гуравдугаар сарын 1-нээс тавдугаар сарын 1-ний өдөр хүртэл Ulaanbaatar.marathon.mn веб хуудсаар үргэлжлэх юм байна.
Энэхүү марафонд мэргэжлийн тамирчид, сонирхогчид, гадаад дотоодын оролцогчид, гэр бүл, хүүхэд залуус зэрэг бүх насны хүмүүс оролцох боломжтой бөгөөд жил ирэх тусам оролцогчдын тоо нэмэгдэж байгаа ажээ. Тус марафон нь гэр бүлийн гүйлт (1500 м), Эрүүл мэндийн гүйлт (5 км), спорт гүйлт (10 км), Хагас марафон (21.095 км), гэр бүлийн гүйлт (1500 м), марафон (42.195 км) гэсэн таван ангиллын хүрээнд явагддаг ба бүртгэлийн хураамж тус бүр 5,000-90,000 төгрөгийн хооронд байдаг.
Энэ долоо хоногоос Улаанбаатар Марафоны маршрутыг танилцуулж эхэлсэн бөгөөд одоогоор 42км, 21 км, 10 км зайн гүйлтийн маршрутыг албан ёсоор танилцуулаад байна. Олон улсын стандартын дагуу хэмжиж, Азийн Хөнгөн Атлетикийн холбоогоор баталгаажсан тус маршрут нь тамирчдын гүйлтэд таатай, Улаанбаатар хотын төвийн гол гудамж, өргөн чөлөөг хамарсан маршрут болохыг зохион байгуулагчид онцолсон юм.
Оролцогчдыг Улаанбаатар Марафоны цахим хаяг болон Ulaanbaatar.marathon.mn веб хуудсаар зочлон марафонтой холбоотой мэдээ мэдээлэл, зөвлөгөө зэрэгтэй танилцахыг Нийслэлийн биеийн тамир, спортын газраас зөвлөж байна.
