Хоёрдугаар сарын 28-нд тэнгэрийн хаяанд зургаан гараг зэрэгцэн харагдана

2025 онд тэнгэрт долоон гараг зэрэгцэн харагдаж байсан бол яг жилийн дараа буюу 2026 оны 2 дугаар сарын 28-ны орой нарны аймгийн зургаан гараг нэг эгнээнд жагсах одон орны ховор үзэгдэл дахин тохиох гэж байна. Энэхүү үзэгдэл нь ийм олон гараг нэг дор цугласан хэлбэрээрээ 2040 он хүртэл дахин давтагдахгүй тул одон орон сонирхогч төдийгүй энгийн иргэдийн хувьд ч алдаж болохгүй ховор боломж ажээ.

Энэхүү "гарагуудын парад"-аар Ангарагаас бусад нарны аймгийн гол гарагууд болох Буд, Сугар, Бархасбадь, Санчир, Тэнгэрийн ван болон Далайн ван гарагууд тэнгэрийн нэг хэсэгт зэрэгцэн харагдах юм.

Гараг бүрийн харагдах байдал ба байршлын онцлог

Гараг бүр өөр өөрийн онцлогтойгоор тэнгэрт байрлах бөгөөд тэдгээрийг дараах байдлаар таних боломжтой юм.

• Бархасбадь: Жагсаалын хамгийн тод гараг бөгөөд тэнгэрийн зүүн өмнөд хэсэгт Сарны ойролцоо маш тод гэрэлтэн харагдах тул энгийн нүдээр шууд таних боломжтой аж.
• Сугар ба Буд: Тэнгэрийн баруун хаяанд, хэвтээ шугамын ойролцоо маш доор байрлана. Сугар гараг тод цагаан өнгөөр гэрэлтэх тул түүний ойролцоо байх арай бүдгэрч харагдах Буд гарагийг олоход "луужин" болох юм. Эдгээр гарагууд нар жаргасны дараа маш хурдан тэнгэрийн хаяанаас доош орох тул цаг алдалгүй ажиглах шаардлагатай байна.
• Санчир: Баруун тэнгэрт Сугар, Буд гарагуудын яг дээр байрлах боловч тэнгэрийн хаяа руу маш ойрхон байх ажээ.
• Тэнгэрийн ван ба Далайн ван: Эдгээр гарагуудыг энгийн нүдээр харах боломжгүй юм. Тэнгэрийн ван гарагийг дурангаар харж болох бөгөөд Үүрийн цолмон оддын доор байрлах болно. Харин Далайн ван нь нар жаргах үеэр хэвтээ шугамд хэт ойрхон байх тул зөвхөн мэргэжлийн өндөр хүчин чадалтай дурангаар харах боломжтой байна.

Ажиглагчдад өгөх анхааруулга ба зөвлөгөө

Одон орны ажиглалт хийхдээ нар бүрэн жаргаагүй байхад дурангаар харж болохгүйг мэргэжилтнүүд сануулж байна. Энэ нь харааг ноцтой гэмтээх аюултай тул зөвхөн нар бүрэн жаргасны дараа ажиглалтаа эхлүүлэх нь зүйтэй юм.

Мөн Буд, Сугар, Санчир гарагууд нар жаргаснаас хойш 30 орчим минутын дараа тэнгэрийн хаяанаас доош орох тул ажиглалт хийх хугацаа бага байгааг анхаарна уу. Тиймээс баруун зүгт өндөр уул, барилгаар халхлагдаагүй задгай газарт очих нь энэхүү гайхалтай үзэгдлийг бүрэн харах боломжийг олгох ажээ.

Энэхүү "гарагуудын парад" нь сансарт гарагууд яг нэг шугамд орж буй хэрэг биш, харин манай дэлхийгээс харахад тэнгэрийн нэг хэсэгт, нэг зам дээр зэрэгцэн харагдаж буй ховор тохиолдол юм.

Эх сурвалж: BBC Sky at Night Magazine