Сэтгэл өвдөх гэдэг үгийг бид ихэвчлэн зүйрлэл төдийхнөөр ашигладаг ч шинжлэх ухааны үүднээс энэ нь бодит физик өвдөлттэй ижил утгатай ажээ. Тухайлбал, UCLA-ийн сэтгэл судлаач Наоми Эйзенбергерийн хийсэн MRI шинжилгээгээр хүн ганцаардах эсвэл бусдад үл тоогдох үед тархины Dorsal Anterior Cingulate Cortex (dACC) хэмээх хэсэг хүчтэй идэвхэждэг болохыг тогтоожээ. Хамгийн гайхалтай нь, бидний гар зүсэгдэх, түлэгдэх үед идэвхэждэг мэдрэлийн систем сэтгэл өвдөх үед ч мөн адил ажилладаг байна.
Тархины хувьд "нийгмээс тусгаарлагдах" нь амьд үлдэхэд заналхийлж буй томоохон аюулд тооцогддог байна. Хувьсал өөрчлөлтийн явцад хүн төрөлхтөн бүлгээрээ байж гэмээ нь аюулаас хамгаалагддаг байсан тул ганцаардах мэдрэмжийг тархи "яаралтай тусламж" хэрэгтэй физик өвдөлт мэтээр хүлээж авдаг байна. Өөрөөр хэлбэл, хэн нэгэнд хаягдах эсвэл хамт олноосоо гадуурхагдах үед мэдрэгддэг тэрхүү "цээж рүү хүнд оргих" мэдрэмж нь тархинаас илгээж буй бодит өвдөлтийн дохио юм.
Энэхүү судалгаа нь ганцаардлыг зөвхөн "сэтгэл санааны асуудал" гэж харалгүйгээр, хүний эрүүл мэндэд үзүүлэх физик нөлөөг нь анхаарах ёстойг сануулж байна. Сэтгэлийн шарх бие махбодын шархтай ижил хугацаанд, ижил хүчтэйгээр эдгэрдэг бөгөөд зарим тохиолдолд өвчин намдаах эм хүртэл сэтгэлийн өвдөлтийг бага зэрэг намдаах нөлөө үзүүлдэг болохыг бусад туршилтууд харуулдаг. Тиймээс бусдад үл тоогдох нь энгийн нэг муухай мэдрэмж биш харин бие махбодод учруулж буй бодит өвдөлт ажээ.
Сэтгэгдэл