Ш.Энхийн-Од 6 дугаар сарын 24,25-нд болох NBA-ийн драфтад оролцоно

Монголын сагсан бөмбөгийн залуу од Шаравжамцын Энхийн-Од 2026 оны 6 дугаар сарын 24,25-нд зохиогдох NBA-ийн драфтад албан ёсоор оролцохоор болжээ. NBA-ийн драфт манай цагаар 6 дугаар сарын 24-ны өглөө 08:00 цагаас эхлэх бөгөөд 2-р тойрог буюу багуудын сонголт 6 дугаар сарын 25-ны 08:00 цагаас явагдана. Монголын спортын суваг болох PSN 1 болон ESPN тоглолтыг шууд дамжуулах юм байна.

NBA драфт гэж юу вэ?

NBA-ийн 30 баг коллеж, бусад лигт тоглож буй залуу тоглогчдоос сонгон авч, мэргэжлийн багт тоглох эрх олгодог сонгон шалгаруулалт юм. Драфтаар сонгогдсон тоглогч тухайн багтай гэрээ байгуулж, NBA-ийн үндсэн бүрэлдэхүүнд эсвэл хөгжлийн лиг (G League)-т тоглох замаар мэргэжлийн карьераа эхлүүлдэг ажээ. Сонгогдоогүй тохиолдолд ч зуны лиг, бэлтгэлийн бааз болон хоёр талын (two-way) гэрээ зэрэг олон боломжууд нээгддэг байна. NBA-ийн драфтад түлхүү тоглогчийн биеийн хөгжил, тоглолтын арга барил, үзүүлэлт, хамгаалалт болон довтолгооны потенциал зэрэг олон үзүүлэлтийг нарийвчлан үнэлж багийн эзэд болон дасгалжуулагчид багтаа нэгтгэн авдаг аж.

Ийнхүү Ш.Энхийн-Од NBA-ийн драфтад оролцсоноор зөвхөн хувь хүний карьерт нөлөөлөөд зогсохгүй Монголын сагсан бөмбөгийн түүхэнд шинэ хуудсыг нээж буй. Драфтын үр дүн ямар гарахаас үл хамааран Ш.Энхийн-Одын энэхүү амжилт нь Монгол тоглогчид NBA-д өрсөлдөх бүрэн боломжтой гэдгийг баталсан чухал үйл явдал болж байгаа юм.

Эх сурвалж: NBA

Гэрэл зургийн эх сурвалж: South Carolina Men’s Basketball