Монгол Улсын Ерөнхийлөгчийн дэргэдэх Хэлний бодлогын үндэсний зөвлөл 2026 оны 2 дугаар сарын 11-ний өдөр хуралдаж, бүх нийтээр дагаж мөрдөх “Монгол бичгийн зөв бичих дүрэм”-ийг баталлаа. Тус зөвлөлийн ээлжит бус хурлаар уг асуудлыг хэлэлцэн шийдвэрлэсэн байна.
Монгол хэлний тухай хуулийн холбогдох заалтыг хэрэгжүүлэх хүрээнд “Монгол бичгийн зөв бичих дүрэм”-ийг боловсруулж, мэргэжлийн судлаачдын санал, хэлэлцүүлгийн үр дүнд төслийг эцэслэн боловсруулжээ. Дүрэмд гадаад үг, олон хувилбарт үг, оноосон нэр, зарим дагавар, нөхцөлийг бичих зарчмыг нэг мөр болгон тусгасан байна.
Ийнхүү батлагдсан “Монгол бичгийн зөв бичих дүрэм” нь цаашид төрийн болон боловсролын байгууллага, хэвлэл мэдээллийн хэрэгсэл, нийт иргэдийн хэрэглээнд баримтлах албан ёсны хэм хэмжээ болж, Монгол бичгийн хэрэглээг жигдрүүлэх, зөв бичих нэгдсэн тогтолцоог бүрдүүлэхэд чухал ач холбогдолтой гэж үзэж байгаа аж.
Сэтгэгдэл