Ирэх долоо хоног буюу наймдугаар сарын 12-ны лхагва гарагт дэлхийн хойд хагаст бүтэн нар хиртэлт ажиглагдах гэж байна. Энэ үеэр сар нарыг түр хугацаагаар бүрэн халхлах бөгөөд АНУ-ын NASA уг үйл явдлыг https://www.nasa.gov/live албан ёсны цахим хуудсаараа дамжуулан шууд хүргэх аж.
Энэхүү нар хиртэлт нь Гринланд, Исланд, Оросын хойд хэсэг, Атлантын далай болон Испани, Португалийн баруун хойд хэсэгт бүтнээрээ харагдах юм. Түүнчлэн, Европ болон Африкийн зарим хэсэгт нар жаргах үетэй давхцан ажиглагдана. Монголын цагаар наймдугаар сарын 13-ны шөнийн 01:15 цагаас NASA-гийн шууд дамжуулалт эхлэх бөгөөд бүтэн хиртэлтийн үргэлжлэх хугацаа нь ихэнх газруудад хоёр минут хүрэхгүй байх ажээ.
Энэ үеэр NASA шинжлэх ухааны судалгаа хийхээр төлөвлөсөн байна. Тухайлбал, нарны титмийн хөдөлгөөнийг судлах зорилгоор өндөр түвшний судалгааны онгоц ашиглах ба Исланд, Испани улсад агаар мандлын тусгай зориулалттай бөмбөлөг хөөргөж хэмжилт хийх юм. Түүнчлэн шууд дамжуулалтын үеэр эрдэмтэд, судлаачид оролцож сонирхолтой ярилцлага өрнүүлэх бөгөөд үзэгчид олон нийтийн сүлжээгээр дамжуулан өөрсдийн сонирхсон асуултаа асууж, шууд холбогдох боломжтой аж. Хиртэлт дууссаны дараах гэрэл зургууд NASA-гийн албан ёсны цахим хуудсанд байрших юм байна.
Эх Сурвалж: NASA
Сэтгэгдэл