Шинэ жилээр кино үзэх нь цагийг хөгжилтэй өнгөрөөхөөс гадна сэтгэл санааг сэргээж, гэр бүл, найз нөхөдтэйгөө халуун дулаан уур амьсгалыг бүрдүүлэх боломжийг олгодог билээ. Тэгвэл баярын өдрөөр гэр бүл, найзууд, хостойгоо эсвэл ганцаараа үзэхэд тохиромжтой ид шидийн, романтик мэдрэмж төрүүлэх дараах 11 киног танд санал болгож байна.
1. Цасан охин / 2010
Арванхоёрдугаар сар гараад албан байгууллага болгон шинэ жил хийдэг байх. Шинэ жил зохион байгуулах арын албанд томилогдсон хүмүүсийн хөгжилтэй түүхийг харуулахын сацуу залуусын хайр сэтгэл, бие биедээ итгэх итгэлийн үнэ цэнийг өгүүлэх энэхүү кино нь романтик төрөлд бахдах хэдий ч киноны хошин харилцан ярианууд нь таныг хором ч уйдаахгүй биз ээ.
2. Serendipity / 2001
Та хувь тавиланд итгэдэг үү? Тэгвэл шинэ жилийн орой хосоороо үзэхэд тохиромжтой 2001 оны “Serendipity” киног танд санал болгож байна. Хоёр хүний зам мөр хэдэн ч удаа салсан учрах ёстой хүмүүс учирдаг хэмээх үгийг уг кино танд батална.
3. Молко / 2021
Уг кино нь бидний амьдрал, тэр дундаа Улаанбаатар хотын залуучуудын амьдрал хэрхэн өрнөдгийг хамгийн энгийн байдлаар харуулсан кино билээ. Баярын өдрөөр найзуудтайгаа суугаад үзэхэд зарим дүрээс нь та өөрийгөө, нөгөө нэгээс нь найзыгаа олж харж ч магадгүй юм.
4. Thinker bell Secret of the Wings / 2012
Хүүхэлдэйн кино дан ганц хүүхдэд зориулсан байдаггүй шүү дээ. Хэдий том болсон ч ид шидэд итгэдэг байсан хүүхэд насандаа дахин очсон мэт мэдрэмжийг төрүүлэх энэхүү анимейшнийг баярын өдөр гэр бүлээрээ үзэхийг танд санал болгож байна.
5. Гоёлын даашинз / 2009
Нөхөрлөл, хайр сэтгэл, өөртөө итгэх итгэлийн үнэ цэнийг харуулсан Монголын 2000-аад оны киноны төлөөл болох уг киног шинэ жилийн баярын өдрөөр үзэхгүй өнгөрч болохгүй билээ.
6. Love Hard / 2021
Жинхэнэ хайр хүний гадаад төрхөд бус чин сэтгэлд оршдог болохыг харуулсан энэхүү кино нь буруу хүнтэй таарсан мэт санагдаж байсан учрал заримдаа биднийг зөв хүн рүү хөтөлж болдгийг танд ойлгуулна. Шинэ ондоо хостой болохоор төлөвлөж байгаа хүн бүхэнд энэхүү киног санал болгож байна.
7. Өвлийн инээмсэглэл
Монголын шинэ жилийг “Өвлийн инээмсэглэл”-гүй төсөөлөхийн аргагүй билээ. Иймд хэд ч үзсэн хэзээ ч уйдамгүй уг бүтээлийг бид шинэ жилийн баярын өдрүүдээр үзэх онцлох контентоор нэрлэн энэхүү жагсаалтдаа онцолж байна.
8. Anastasia / 1997
Уг анимейшний вальсын аян дээр цасан охины бүжиг хийж үзээгүй хүүхэд бараг байхгүй биз ээ. “Анастасиа” бол өөрийн мөн чанарыг эрж хайх, хаанаас ирснээ санах, хайртай хүмүүстээ буцаж очих зоригийн тухай өгүүлдэг.
9. Би чамд хайртай / 1985
Монголын кино урлагийн түүхэн дэх хамгийн яруу бүтээлүүдийн нэг бол “Би чамд хайртай” уран сайхны кино юм. Хүний эгэл амьдралаас ундрах хайрын түүх, үе үеийн үзэгчдийн сэтгэлийг хөдөлгөсөн харилцан яриа нь өнөөдрийг хүртэл үнэ цэнтэй хэвээр. Цонхоор Дэлгэрийг ширтэн хоцрох тэр л дүр зургийг шинэ жилийн үдэш үзэхгүй өнгөрч болшгүй билээ.
10. Holiday / 2006
Өөр өөр амьдралтай хоёр бүсгүй өдөр тутмын амьдралаас түр завсарлага авч, өөрсдийн байрыг солилцсоноор амьдралаа цоо шинээр эхлүүлдэг. Энэхүү романтик кино нь шинэ он гарахад амьдралын шинэ хуудас эхэлдэг болохыг удаан хугацаанд өөрийгөө мартсан хэн бүхэнд сануулах биз ээ.
11. Сүүлчийн монита / 2018
Оюутан насны хүсэл мөрөөдөл, хайр дурлал, хамгийн нандин бүхнийг харуулах энэхүү киног хуучин дурсамжаа сэргээхээр найзуудтайгаа хамт үзвэл илүү тохирох болно.
