Улаанбаатар хотноо олон улсын "COP17" хурал зохион байгуулагдахтай холбогдуулан наймдугаар сарын 17-ноос 28-ны өдрүүдэд зарим чиглэлийн авто замын хөдөлгөөнийг хэсэгчлэн хязгаарлахаар болжээ.
Тодруулбал, "COP17" олон улсын хурлын үндсэн арга хэмжээнүүд Үндэсний цэцэрлэгт хүрээлэн дэх түр байгууламжид болох тул хурлын өдрүүдэд өглөөний 07:00-оос 21:00 цагийн хооронд дараах замуудын хөдөлгөөнийг хаана. Үүнд:
- Өгөөмөр захын зүүн урд талын нүхэн гарцаас Нарантуулын уулзвар хүртэлх зам
- Нарантуулын уулзвараас урагш төмөр замын гарц даван Дүнжингаравын зүүн урд уулзвар хүртэлх зам
- Дүнжингаравын зүүн урд уулзвараас Зүүнжанжингийн уулзвар хүртэлх зам хамаарна.
Энэхүү хаалттай бүсэд зөвхөн тухайн орчинд оршин суудаг болон ажилладаг иргэдийн тээврийн хэрэгслийг бүртгэлийн дагуу нэвтрүүлэх бөгөөд тусгай албаны автомашинууд чөлөөтэй зорчих зохицуулалт хийхээр болжээ.
Мөн хурлын өдрүүдэд хичээлийн шинэ жилийн бэлтгэл давхцаж байгаа тул замын хөдөлгөөний ачааллыг багасгах зорилгоор худалдааны төвүүд болон зам дагуух авто зогсоолуудыг нэгмөсөн хаахаар шийдвэрлэсэн байна. Тодруулбал, Нарантуул, Дүнжингарав, Шинэ 100 айл төвийн гаднах авто зогсоолууд бүрэн ажиллахгүй. Мөн Зүүн 4 зам, Замын цагдаагийн баруун урд уулзвар, Чулуун овооны тойрог, Их Монгол уулзвараас Нарантуул руу чиглэсэн замууд болон Хоум плазагаас Баянмонгол хорооллын урд замаар Дүнжингаравын зүүн урд уулзвар хүртэлх авто зам дагуух зогсоолуудыг хаахаар болжээ.
