АНУ-ын гэрэл зурагчин Дэйв Кругман (Dave Krugman) Нью-Йорк хотын шөнийн гэрэлт цонхны зургийг бүтэн таван жилийн турш дурандаа буулгаж, нийт 1000 гаруй цонхны зураг даржээ. Тэрбээр эдгээр зургуудыг олон нийтийн гудамж, талбайгаас авсан бөгөөд хөшиг нь нээлттэй цонх болон цонхны цаадах хувь хүний нууцыг дэлгэхгүйгээр, алсын зайнаас ажиглан буулгасан байна. Эдгээр зургууд нь олон сая хүн бужигнасан их хотын завгүй амьдралын хэмнэл дундах эгэл жирийн амьдралыг гэрэл зургийн хальсаар дамжуулан хүргэж байгаа аж.
Нью-Йорк шиг том хотод олон хүн нэг дээвэр доор амьдардаг ч бие биеэ огт танихгүй байх нь ердийн үзэгдэл юм. Кругман энэхүү бүтээлээрээ дамжуулан орчин үеийн хотын оршин суугчдын ганцаардал болон хүн хоорондын харилцааг нэгэн зэрэг харуулахыг хүссэн гэнэ. Цонх бүрийн цаана өөр өөрийн гэсэн баяр гуниг, мөрөөдөл, амьдралын түүх өрнөж буйг гэрэл зурагчин гэрэл сүүдрийн гайхалтай хослолоор дамжуулан харуулсан нь олон нийтэд "Бид хэдий тусдаа боловч нэгэн том нийгмийн эд эс" гэх гүн гүнзгий ойлголтыг төрүүлж байна хэмээн онцолжээ.
1000 гаруй зургийн дараа гэрэл зурагчин Дэйв Кругман эдгээр олон зуун салангид цонхны зургуудаа нэгтгэж, "Төсөөллийн барилга" хэмээх нэгэн том зургийг бүтээжээ. Ийнхүү энэхүү зургийн цуглуулга нь Нью-Йорк хотын шөнийн амьдралын нэгэн том хөрөг болон хувирсан байна. Хэдэн мянган өөр амьдрал, өөр хувь тавилан шөнө бүр зэрэгцэн оршиж байдгийг дэлгэн харуулсан уг бүтээл нь бидний амьдралын олон талт байдлын бодит баримт болон олон жилийн турш хадгалагдан үлдэх юм.
Эх сурвалж: Dave Krugman
