Зүүн Азийн эрэгтэйчүүдийн волейболын аварга шалгаруулах тэмцээний гурав дахь өдрийн тоглолтууд "ACA Aрена"-д өндөрлөж, хэсгийн шатны хаалтын шийдвэрлэх өрсөлдөөнөөр хагас шигшээд өрсөлдөх багуудын нэрс тодорлоо. Манай редакц тэмцээний өдөр бүрийн тоглолтын тойм, үр дүн болон тамирчдын сэтгэгдлийг уншигчдадаа цаг алдалгүй хүргэж байгаа билээ.
Тэмцээний гурав дахь өдрийн тоглолтын үр дүн
Үдээс хойш 13:30 цагаас эхэлсэн хэсгийн шатны хаалтын өдрийн эхний тоглолт Макао болон Өмнөд Солонгосын шигшээ багуудын хооронд өрнөж, 3:0 (25:18, 25:16, 25:15) харьцаагаар Өмнөд Солонгосын баг ялалт байгууллаа. Тэд тоглолтын туршид тактикийн оновчтой шийдлүүдийг хэрэгжүүлж, онооны давуу байдлаа хадгалсаар ийнхүү ялалт байгуулсан юм.
Үргэлжлүүлэн 16:30 цагаас Япон болон Тайванийн шигшээ баг учраа тааран тоглож, 3:0 (25:18, 25:18, 40:38) харьцаагаар өндөрлөсөн энэхүү тоглолтод Японы баг ялалт байгууллаа.
Тайванийн шигшээ багийн тамирчин, довтлогч Лю Ю Лин (Liu Yu Lin) тэмцээний явцын талаар “Энэ удаагийн тэмцээний хамгийн хүчтэй өрсөлдөгчөөр Монгол эсвэл Япон улсын баг хэмээн харж байлаа. Бид өнгөрсөн жил Монгол Улсын үндэсний шигшээ багтай клубийн аваргын тэмцээнд тоглож 3:0-ээр хожигдож байсан болохоор тэд бол чанга өрсөлдөгч. Түүнчлэн тэд өрсөлдөгчөө судалж, мэдээлэл цуглуулах тал дээр маш сайн ажилладаг. Эцэст нь, тоглолт бүрд биднийг тууштай дэмждэг хөгжөөн дэмжигчдэдээ маш их баярлалаа. Бид бүгдийнх нь өгсөн урам зоригийг тээж, цаашид ч илүү хичээж урагшаа тэмүүлэх болно" хэмээн сэтгэгдлээ хуваалцсан юм.
Харин оройн 19:30 цагаас энэ өдрийн хамгийн оргил тоглолт болох Монгол Улс болон БНХАУ-ын шагшээ багуудын учраа таарсан тоглолт 3:0 (25:20, 25:22, 25:15) харьцаагаар өндөрлөлөө. “АСА Арена” дүүрэн үзэгчдийн халуун дэмжлэг дор өрнөсөн тоглолтод Монгол Улсын шигшээ баг ялалт байгуулснаар хэсгийн шатны тоглолтууд ийнхүү албан ёсоор өндөрлөж байна.
БНХАУ-ын шигшээ багийн тамирчин, холбогч Жэн Чи (Zheng Qi) тэмцээний талаарх сэтгэгдэлдээ "Тэмцээний шүүгчид болон арын албаныхан маш мэргэжлийн байхаас гадна оролцож буй багууд бүгд жигд, өрсөлдөөн өндөртэй байгаа нь ажиглагдлаа. Мэдээж бид дараа дараагийн тоглолтууддаа ч мөн ялалт байгуулах том зорилготой байгаа. Тиймээс өнөөдрийн тоглолтод гаргасан алдаа дутагдалдаа дүгнэлт хийж, дараагийн тоглолтууддаа дахин гаргахгүй байхад голлон анхаарах болно" гэлээ.
Мөн тэмцээний үеэр Хонгконгийн шигшээ багийн ахлагч Юуан Зэ Вай (Yuen Sze Wai) тэмцээний талаар сэтгэгдлээ хуваалцахдаа, "Миний хувьд Монгол Улс, БНСУ болон Тайванийн багуудыг энэ тэмцээний хамгийн хүчтэй өрсөлдөгчид гэж харж байлаа. Учир нь тэдний бүрэлдэхүүнд олон улсын чанартай мэргэжлийн лигүүдэд тоглодог, туршлагатай тамирчид олон байгаа нь харагдсан юм. Мөн тоглолт явагдсан заалны орчин болон үзэгчдийн халуун дулаан уур амьсгал үнэхээр гайхалтай байсныг онцолмоор байна. Биднийг дэмжиж буй болон зааланд хуран цугласан бүх хүмүүстээ чин сэтгэлийн талархал илэрхийлье" гэлээ.
Хагас шигшээд өрсөлдөх багууд
Ийнхүү хэсгийн шатны сонирхолтой бөгөөд ширүүн өрсөлдөөнүүд өндөрлөж, хагас шигшээ шатанд өрсөлдөх шилдэг дөрвөн баг албан ёсоор тодорлоо. Энэ удаагийн тэмцээний медалийн төлөөх өрсөлдөөнд Монгол Улсын үндэсний шигшээ баг, Япон, БНХАУ болон БНСУ-ын шигшээ багууд тус тус шалгарч, шийдвэрлэх тоглолтуудад хүч үзэхээр боллоо.
Маргаашийн тоглолтын хуваарь
Тэмцээний дөрөв дэх өдөр буюу наймдугаар сарын 8-нд "ACA Aрена"-д хагас шигшээ болон шигшээ тоглолтууд дараах байдлаар үргэлжилнэ.
- 13:30 цагаас: Хонконг vs Макао (HKG vs MAC)
- 16:30 цагаас: Монгол Улс vs Япон (MGL vs JPN)
- 19:30 цагаас: Өмнөд Солонгос vs БНХАУ (KOR vs CHN)
Тоглолтын хуваарь болон үр дүнгүүдийн талаар бид цаг алдалгүй хүргэж байгаа билээ. Иймд уншигч та бүхэн бидэнтэй хамт байж, тэмцээний талаарх мэдээллийг тогтмол хүлээн аваарай..
