Хүн төрөлхтөн 54 жилийн дараа сансрын тойрог руу дахин нисэх гэж байна

АНУ-ын Сансар судлал, сансрын удирдлагын газар (NASA) "Artemis II" даалгаврын хүрээнд хүн төрөлхтнийг сарны тойрог замд эргүүлэн аваачих бэлтгэл ажлыг хангаж байна. Хамгийн сүүлд 1972 онд "Аполло-17" хөлгөөр сарны гадаргууд хүрч байснаас хойш 54 жилийн дараа ийнхүү дахин хүн тээвэрлэсэн хөлгийг сарны зүг хөөргөхөөр төвлөрч байгаа юм. Техникийн аюулгүй байдлын үүднээс хэд хэдэн удаа хойшлогдож байсан уг нислэгийг ирэх дөрөвдүгээр сарын 1-ний өдөр эхлүүлэхээр албан ёсоор товлоод байна.

Энэхүү түүхэн даалгаврын нэг онцлох үйл явдал нь багийн бүрэлдэхүүнд сарны тойрог зам руу аялах анхны эмэгтэй сансрын нисгэгч багтсан явдал юм. NASA-гийн инженер Кристина Кох (Christina Koch) нь сарны зүг хүлэг жолоодох дэлхийн анхны эмэгтэй болон түүхэнд бичигдэхээр бэлтгэгдэж байна. Тэрбээр өмнө нь Олон улсын сансрын станцад (ISS) эмэгтэй сансрын нисгэгчдээс хамгийн удаан хугацаагаар ажилласан дээд амжилтыг эзэмшдэг бөгөөд түүний туршлага уг даалгаврын амжилтын гол хүчин зүйл болохыг албаныхан онцолж байгаа юм.

"Artemis II" даалгавар нь нийт 10 хоногийн турш үргэлжлэх бөгөөд сансрын нисгэгчид сарны алслагдсан талыг тойрон нисэж, хөлгийн системийг сансрын гүнд турших үндсэн зорилготой аж. Түүнчлэн, энэхүү нислэг нь саран дээр шууд буухгүй бөгөөд харин сарны татах хүчний бүсэд нэвтэрч, тойрог замын дагуу аялсны дараа эх дэлхийдээ эргэн ирэх юм. Ийнхүү дэлхийн татах хүчнээс гарч, сарны орчимд ажиллах нь дараагийн шатны "Artemis III" буюу сарны гадаргуу дээр хүн буулгах даалгаврын техникийн болон стратегийн суурийг тавих ач холбогдолтой .

Одоогоор Кеннедийн нэрэмжит сансрын төвд Space Launch System (SLS) аварга пуужин болон Orion хөлгийн техникийн шалгалтууд эцсийн шатандаа явагдаж байна. НАСА-гийн удирдлагууд хөөргөх хугацааг дөрөвдүгээр сарын эхээр товлосон хэдий ч цаг агаарын нөхцөл байдал болон тоног төхөөрөмжийн аюулгүй байдлыг нэн тэргүүнд тавьж байгаагаа мэдэгджээ. 

Эх сурвалж: BBC агентлаг