Өнөөдөр Монголын орчин үеийн түүхийг үндэслэгч, цэргийн гарамгай зүтгэлтэн, Ардын хувьсгалын удирдагч Дамдины Сүхбаатарын мэндэлсний 133 жилийн ой тохиож байна. Тэрбээр 1893 оны 2 дугаар сарын 2-нд хуучнаар Их Хүрээний Маймаа хотноо ядуу ард Дамдины гэрт мэндэлж, Монгол орны тусгаар тогтнол, бүрэн эрхт байдлын төлөөх тэмцэлд амь биеэ зориулсан юм.
Д.Сүхбаатар нь хорьдугаар зууны эхэн үеийн Монголын нийгэм, улс төрийн эгзэгтэй цаг үед Ардын журамт цэргийг удирдан зохион байгуулж, 1921 оны Ардын хувьсгалыг ялалтад хүргэхэд шийдвэрлэх үүрэг гүйцэтгэсэн билээ. Тэрбээр цэргийн эрдэмд гарамгай нэгэн байснаас гадна Монгол Ардын Намыг үүсгэн байгуулалцаж, улс орноо шинэ цагийн хөгжлийн замд хөтлөх төрийн бодлогын үндэс суурийг тавьсан билээ. Түүний байгуулсан гавьяаг үнэлж, Монгол Улсын Засгийн газраас "Улсын баатар" цолыг анхлан олгож байсан түүхтэй.
Жил бүрийн энэ өдөр төр, нийгмийн зүтгэлтэн, эрдэмтэн судлаачид болон Зэвсэгт хүчний бие бүрэлдэхүүн түүний хөшөөнд цэцэг өргөн хүндэтгэл үзүүлж, эрдэм шинжилгээний хурал, түүхийн хичээлүүдийг зохион байгуулдаг уламжлалтай. Энэхүү өдөр нь Монгол хүн бүрийн зүрх сэтгэлд эх оронч бахархлыг төрүүлж, тусгаар тогтнолынхоо төлөө эв нэгдэлтэй байхын чухлыг сануулсаар байна.
Сэтгэгдэл