АНУ, Канад болон Мексик улсуудын 16 хотод ирэх зургаадугаар сарын 11-нээс долоодугаар сарын 19-ний хооронд зохион байгуулагдах 23 дахь удаагийн хөлбөмбөгийн ДАШТ-д оролцох багуудын нэрс албан ёсоор тодорлоо. Тэмцээний сүүлийн эрхүүдийг шийдвэрлэх УЕФА болон тив хоорондын плей-оффын тоглолтууд гуравдугаар сарын 31-нд өндөрлөснөөр хөлбөмбөгийн хорхойтнуудын хүсэн хүлээсэн 48 багийн жагсаалт бүрэн бүрдэв.
Энэ удаагийн сонгон шалгаруулалтын хамгийн том дуулиан нь дэлхийн дөрвөн удаагийн аварга Италийн шигшээ баг Босни ба Герцеговинад хожигдож, тэмцээнийг өнжихөөр болсон явдал байлаа. Харин Европын бүсээс Чех, Турк, Швед улсууд эрхээ авч чадсан бол плей-оффын шийдвэрлэх тоглолтод Конго болон Ирак улсууд тус тус ялалт байгуулснаар дэлхийн аваргыг зорих сүүлийн багуудаар тодорсон юм.
Нийт 48 баг оролцох энэхүү өргөтгөсөн форматтай тэмцээнд зохион байгуулагч гурван улс шууд оролцох эрхээ авсан бол үлдсэн 45 эрхийг тивийн холбоодын сонгон шалгаруулалт болон плей-оффын тоглолтуудаар олгожээ. Ийнхүү 2023 оны есдүгээр сараас эхэлсэн урт хугацааны шалгуур өндөрлөж, хөлбөмбөгийн түүхэн дэх хамгийн том цар хүрээтэй, 104 тоглолт үргэлжлэх ДАШТ-ий үндсэн шатны тоглолтууд эхлэхэд бэлэн болоод байна. Түүхэнд анх удаа 48 баг 12 хэсэгт хуваагдан өрсөлдөх энэхүү тэмцээн нь хөлбөмбөгийн хөгжилд шинэ хуудас нээх онцлох үйл явдал болно гэдгийг хөлбөмбөг сонирхогчид онцолж байгаа аж.
Эх сурвалж: BBC агентлаг
