2025 оны “Ig Nobel” шагналын Сэтгэл судлал төрөлд Марчин Заженковский ба Гилл Гигнак нар “Хүмүүст ухаантай гэж хэлэх нь нарциссист өвөрмөц байдлын мэдрэмжтэй холбоотой: IQ-ийн хариу үйлдлийн түр зуурын төлөв байдлын нарциссизмд үзүүлэх нөлөө” судалгаа шалгарчээ. Судалгаагаар хүмүүст “Та ухаантай” гэж хэлэх нь тэдний нарциссист байдлыг өдөөж, өөртөө итгэх итгэлийг нэмдгийг баталсан. “Ig Nobel” нь эхлээд хүмүүсийг инээлгээд, дараа нь бодоход хүргэх зорилготой хөгжилтэй шагнал аж.
Шагналыг ёслолын үеэр зарлахдаа "Нарциссистуудад эсвэл өөр хэн нэгэнд тэднийг ухаантай гэж хэлэхэд юу болдгийг судалсны төлөө олголоо” гэж зарлажээ.
Магтаал нь нарциссизмын суурь шинж чанарыг өнөөдөг
Судлаачид Польш улсад 361 хүнийг хамарсан туршилт хийсэн байна. Ингэхдээ IQ тесттэй төстэй богинохон даалгавар өгсөн. Гэхдээ судлаачдын зорилго ухааны түвшин хэмжих биш, хүн IQ-ийн тухай мэдээлэл сонсоход яаж сэтгэл зүй нь өөрчлөгдөх вэ гэдгийг харах байсан тул жинхэнэ IQ тест биш байсан юм.
Судалгааны үр дүнд IQ тестийн хариуг нь дунджаас их гэж хэлсэн бүлгийн хүмүүс өөрсдийгөө илүү ухаалаг гэж бодохоос гадна, өөрийгөө “онцгой” гэж мэдрэх мэдрэмж нэмэгдэж, нарциссизмын тодорхой шинж тэмдгүүд өсжээ. Харин эсрэгээр “дунджаас бага” дүн авсан гэж хэлсэн хүмүүсийн өөртөө итгэх итгэл багасаж, өвөрмөц байдлын мэдрэмж буурсан байна. Мөн магтаал нь өөртөө итгэх итгэл, өвөрмөц байдлын мэдрэмжийг богино хугацаанд нэмж болох ч нарциссизмын суурь шинж чанартай холбогдох боломжтойг сануулсан юм.
