Залуусын орон зай

Мийм (meme) болсон хүмүүст юу тохиолддог вэ? 

Б.Намуун•2025.04.28•4 минут унших
Мийм (meme) болсон хүмүүст юу тохиолддог вэ?  - нийтлэлийн зураг (гар утасны хувилбар)

Та зүгээр л нохойныхоо эгдүүтэй зургийг интернэтэд нийтэлж, өөрийнхөө хөгжилтэй агшныг бусадтай хуваалцан эгэл жирийн амьдралаараа амьдарч байлаа. Гэтэл маргааш өглөө нь таны зурган дээр тод цагаан тайлбар бичээд, хэдэн мянга бүр хэдэн сая хүн инээлдэж байна. Ямар санагдах бол? Энэ нийтлэлд бид тэрхүү инээдмийн цаадах бодит амьдралын хөшгийг нээж, мийм болсон хүмүүст юу тохиолддог талаар мэдэж авах болно.   

“Сүйрэл дагуулагч охин” Зое Рот NFT-ээ 473,000 доллароор зарсан  

Мийм (meme) болсон хүмүүст юу тохиолддог вэ?  нийтлэлийн зураг
2005 онд Зое Ротыг дөнгөж 4 настай байхад түүний аав Дэйв Рот Хойд Каролинагийн Мебане дахь амьдардаг хороололдоо гал гарч буй байшингийн өмнө зогсож буйгаар зургийг нь авчээ. Уг гал нь ямар ч аюулгүй, орон нутгийн гал унтраах ангийн сургуулилтын нэг хэсэг байсан аж. Охины үл ялиг инээгээд камер руу харах уг зургийг аав нь 2007 оны гэрэл зургийн уралдаанд оруулснаар олонд танигдаж, удалгүй цахим ертөнцөд тарсан юм. Зое охин уг миймээс болж ямар нэг байдлаар дээрэлхүүлж гадуурхагдаж байгаагүй ч "Сүйрэл дагуулагч охин" гэдгээр танигдсан нь эвгүй байсан тухайгаа хуваалцаж байжээ.   

2021 оны дөрөвдүгээр сард 21 настайдаа Зое болон түүний гэр бүлийнхэн уг зургийн эхийг өмчлөх боломжгүй токен буюу NFT болгон 473,000 ам.долларын үнээр зарсан юм. Хэдийгээр зургаа NFT болгон зарсан ч хууль ёсны эрхийг өгөөгүй.  Хэрэв үүнийг худалдан авсан хүн хожим дахин худалдвал Зое борлуулалтын үнийн дүнгээс автоматаар 10 хувийг авна гэсэн үг. Тэрбээр мөнгөө сургалтын зээлээ төлж, боловсролдоо хөрөнгө оруулах байдлаар зарцуулсан билээ.   

“Азгүй Брайн” Кайл Кравен Volkswagen-ий сурталчилгаанд тоглов 

Мийм (meme) болсон хүмүүст юу тохиолддог вэ?  нийтлэлийн зураг
2005 онд Охайо мужийн ахлах сургуулийн сурагч Кайл Кравен монтажныхаа зургийг шоглон, албаар инээдтэй зураг гаргахаар шийджээ. Ийнхүү зориудаар хуучирсан ноосон хантааз өмсөж, нүүрээ улайлгахын тулд үрж, тэнэг инээмсэглэл тодруулан авхуулсан аж. Сургуулийн захирал энэ зургийг зохисгүй гэж үзээд дахин авахыг хүссэн байна. Гэсэн хэдий ч Кайл болон түүний найз Иан Дэвис аль хэдийн эл зургийг сканердан авч хадгалжээ. Олон жилийн дараа 2012 оны нэгдүгээр сарын 23-нд Иан энэ зургийг Reddit сайтад нийтэлсэн нь маш хурдан олны анхаарлыг татаж, инээдтэй байдлаар азгүйдсэн хүнийг илэрхийлэх "Азгүй Брайн" мийм бий болсон юм.  

Тэрбээр уг зургаа ашиглан мөнгө олж эхэлсэн бөгөөд зураг нь Walmart, Hot Topic зэрэг жижиглэн худалдаалагчдын цамц, чихмэл тоглоом зэрэг зүйлс дээр хэвлэгдэх болов. Мөн Volkswagen, McDonald's зэрэг компаниудын сурталчилгааны кампанит ажилд Азгүй Брайн дүрээрээ тоглож ч байлаа. 

2021 онд Кайл зургаа NFT болгон 36,000 доллароор зарсан юм. Тэрбээр өдгөө аавынхаа сүмийн барилгын компанид үйл ажиллагаа эрхэлсэн захирлаар ажилладаг бөгөөд нэгэн ярилцлагадаа энэ бүхэн түүнд төсөөлөөгүй онцгой боломж, туршлагыг авчирсан хэмээж байв. 

Эгдүүтэй Шиба Ину нохойны NFT-ийг 4 сая доллароор зарсан 

Мийм (meme) болсон хүмүүст юу тохиолддог вэ?  нийтлэлийн зураг
2008 онд Японд нэгэн гөлгийг эвтанази хийж “унтуулах” гэж байхад цэцэрлэгийн багш Ацуко Сато түүнийг өргөж авчээ. Тэр гөлөг бол хожим интернэтийн од болсон Кабосу юм. Шинэ тэжээвэр амьтдынхаа зургийг хуваалцах зорилгоор Сато блог нээсэн бөгөөд 2010 онд Кабосугийн хажуу тийшээ харсан өхөөрдөм зургийг нийтэлснээр “од” болсон юм. 2021 онд уг зургийг NFT хэлбэрээр 4 сая доллароор зарсан билээ.  

2024 оны тавдугаар сарын 24-нд Кабосу өвчний улмаас 18 настайдаа өөд болсон юм. Японы Чиба мужийн Сакура хотод Кабосу болон түүний эзэн Сато хоёрын байнга очдог цэцэрлэгт хүрээлэнд түүний хүрэл хөшөөг босгосон байдаг.   

Миймээс болж моделийн карьераа алдсан нь

Мийм (meme) болсон хүмүүст юу тохиолддог вэ?  нийтлэлийн зураг
Хоёр царайлаг ази хосын хүүхдүүд нь царай муутай байгаа зургийг та харж л байсан байх. “Гоо сайхны мэс засал генийг өөрчлөхгүй” гэсэн тайлбартай их харагддаг байсан даа. 2012 онд Тайванийн загвар өмсөгч Хэйди Йе гоо сайхны эмнэлгийн сурталчилгааны зурагт оржээ. Энэ зураг цаашид “Нэгэн залуу эхнэрээ царай муутай хүүхэд төрүүлснийх нь төлөө шүүхэд өгч, эхнэрээ гэрлэхээсээ өмнө их хэмжээний гоо сайхны мэс засал хийлгэсэн болохыг олж мэджээ" гарчигтай зураг болон тарсан юм. Хүмүүс үүнийг үнэн гэж хэт итгэсэн учраас бүсгүй моделийн карьераа алдаж, сэтгэл гутралд орсон билээ.   

“Оддын дайны хүүхэд” Гислейн Раза сургуулиа хаясан  

2003 онд Гислейн Раза хүү Оддын дайны гэрлийн сэлмээр тулалдаж байгаа мэт дүр үзүүлж буй бичлэгийг "Jackass_starwars_funny.wmv" гэсэн нэрээр интернэтэд нийтэлжээ. Гэвч энэ явдлаас үүдэн түүнийг цахим орчинд ч, бодит амьдрал дээр ч үе тэнгийнхэн нь дээрэлхэж, дарамталж эхэлсэн бөгөөд эцэст нь сургуулиа орхисон юм. Хожим ярилцлага өгөхдөө үүнээс болж сэтгэл зүйн хямрал, түгшүүрт автсан гэдгээ хүлээн зөвшөөрсөн билээ. 2003 оны долоодугаар сард Разагийн гэр бүл бичлэгийг нийтэлсэн ангийн хүүхдүүдийнх нь ар гэрийнхний эсрэг шүүхэд нэхэмжлэл гаргаж, сэтгэл санааны дарамт учруулсан хохирлыг барагдуулахыг хүссэн. Ийнхүү 2006 онд ч шүүхээс гадуур тохиролцсон аж. 

Цахим орчинд мийм болон мөнхөрсөн хүмүүс энэ амьдралыг сонгоогүй ч мийм тэднийг сонгосон юм. Зарим нь амжилтад хүрч, зургаараа мөнгө олон, сурталчилгаанд тоглосон бол зарим нь карьераа алдаж, сэтгэл гутралд орон, хүнд хэцүүг туулсаар. Мийм хэдий хөгжилтэй ч үүний ард бодит оршихуй байгааг санаж, болгоомжтой хандаж байгаарай! Магадгүй та дараагийн алдартай мийм болох ч юм бил үү... 

Холбоотой нийтлэлүүд