Швейцарын Давос хотноо нэгдүгээр сарын 20-25-ы хооронд Дэлхийн эдийн засгийн форум зохион байгуулагдаж байна. Уг форумын зүгээс дэлхийн хэмжээнд тулгамдаж буй сорилтуудыг шийдвэрлэхийн тулд томоохон судалгааны байгууллагуудтай идэвхтэй хамтран ажилладаг. Аливаа судалгааны гол зорилго нь шинэчлэл хийж, асуудлаас урьдчилан сэргийлэн, юу, яагаад, яаж гэсэн асуултад хариулт авахад чиглэдэг билээ. Иймээс олон улсын хэмжээнд хийсэн томоохон судалгаануудыг уншиж танилцсанаар хамгийн сүүлийн үеийн, үнэн зөв мэдлэгтэй болж, шийдвэр гаргах чадвараа сайжруулах юм.  

Дэлхийн эдийн засгийн форумаас жил бүр олон төрлийн сэдвээр томоохон судалгаанууд хийдэг. Уг судалгааг та интернэтээс үнэгүй, шууд унших боломжтой байдгаараа давуу талтай бөгөөд өнөөгийн болон ирээдүйн хэтийн төлөвийг мэдэж авах юм шүү.  

Онцлох судалгаанууд 

Дэлхийн эрсдэлийн үнэлгээ 2025

Яагаад унших хэрэгтэй вэ? 

• Стратегийн шийдвэр гаргахад тусална. Энэхүү тайланд дэлхийн хэмжээнд тулгамдаж буй эрсдэлүүдэд иж бүрэн дүн шинжилгээ хийсэн нь Засгийн газар, бизнес, иргэний нийгмийн шийдвэр гаргагч, хувь хүмүүст илүү мэдээлэлтэй сонголт хийх боломжийг олгох юм. 
• Болзошгүй аюулаас урьдчилан сэргийлнэ. Тайланд дурдсан чиг хандлагын талаар тодорхой төсөөлөлтэй байснаар оролцогч талуудад бэрхшээл, боломжуудыг шууд аюул болохоос нь өмнө урьдчилан харахад тусална. 
• Бизнесийн тасралтгүй, тогтвортой байдал. Эрсдэлийг эрт илрүүлэх нь дасан зохицох чадварыг бий болгох, саад бэрхшээлээс зайлсхийхэд чиглэсэн идэвхтэй арга хэмжээ авахад тусалдаг. 
• Нийгмийн хариуцлагыг дээшлүүлнэ. Уур амьсгалын өөрчлөлтийн талаарх санаа зовоосон асуудал нь сэргээгдэх эрчим хүч, өөрчлөлтөд тэсвэртэй дэд бүтцэд хөрөнгө оруулалт нэмэгдэхэд хүргэж чадна. Түүнчлэн хүн нэг бүр асуудлыг ухамсарлан, хувь нэмрээ оруулах боломж бүрдэх билээ.  

Ажлын байрны ирээдүйн тайлан 2025 

Яагаад унших хэрэгтэй вэ? 

• Хөдөлмөрийн зах зээлийн өөрчлөлтийг урьдчилан таамаглах. Энэ нь бизнес эрхлэгч болон ажилтнуудад ур чадварын хомсдолоос зайлсхийхэд тусалж, ирээдүйд бэлтгэх боломжийг олгох юм.  
• Шинээр гарч ирж буй үүрэгт дасан зохицох нь. Энэхүү тайланд хиймэл оюун ухаан, тогтвортой байдал, эрүүл мэнд, кибер аюулгүй байдалтай холбоотойгоор  шинээр гарч ирж буй ажлын байруудыг онцолдог. Иймээс тус тайлантай танилцсанаар үр дүнтэй ажиллах боломж бүрдэнэ.  

ДЭЗФ-ын судалгаануудыг хаанаас олох вэ?  

• Дэлхийн эдийн засгийн форумын албан ёсны веб сайтаар зочлоорой. Уг сайтын “Publications” хэсэгт судалгаануудын тайланг татаж авч болохоор байршуулдаг учраас бүрэн эхээр нь унших боломжтой.  
• Цахим орчинд “World Economic Forum” хаягийг дагаарай. LinkedIn, Twitter, Facebook, Instagram зэрэг платформ дээр албан ёсны хуудаснуудыг дагаснаар шинэ судалгаа, үйл явдлуудтай хурдан танилцана.  

Олон улсын судалгаануудтай яагаад танилцах хэрэгтэй вэ? 

Олон улсын судалгаанууд нь олон эрдэмтдийн хяналт, шүүмжээр дамжиж, өргөн цар хүрээний өгөгдлийг шинжилж үзсэний үр дүнд гардаг дүгнэлт учраас бодит үнэн гэж итгэж болохуйц баримт юм. Иймээс энэ төрлийн судалгаануудтай аль болох танилцаж байх хэрэгтэй. Тэр дундаа  хамгийн том байгууллагууд, олон улсын төрийн тэргүүнүүд оролцдог Дэлхийн эдийн засгийн форумын судалгаанд илүү нэр хүндтэй судлаач, эрдэмтэд ажиллаж, хяналт шалгалт ч сайн хийдэг. Түүнчлэн дэлхийн ирээдүйн чиг хандлага хаашаа чиглэж байгааг үнэнд хамгийн ойроор хэлэлцдэг тавцан тул бид үүнд анхаарлаа хандуулах нь зүйтэй юм. 

Хэрхэн судалгаа уншиж сурах вэ? 

Шинжлэх ухааны өгүүлэл, судалгааны тайлан нь энгийн хүн уншихад хэцүү байх нь бий. Академик стандартын дагуу бичдэг учраас энгийн сэтгүүл уншиж буй мэт ойлгоход хүндрэлтэй. Гэхдээ бид ямар нэгэн баримт, нотолгоо хайж л байгаа бол шинжлэх ухааны өгүүлэлд тулгуурлах хэрэгтэй. Миний хувьд өгүүллийг шууд уншдаггүй. Аливаа шинжлэх ухааны өгүүллийг уншаад, энгийн үгээр товчилж тайлбарласан судлаачдын нийтлэлийг уншдаг. Уг товчлолыг бичсэн хүмүүс өөрсдөө судлаач байхын зэрэгцээ редакцын хамт олон давхар хянаж байгаа тул итгэж уншдаг юм. Зарим нэг өгүүллийг заавал өөрөө унших хэрэгцээ мэдээж үүснэ. Энэ үедээ судалгааны ажлын хураангуй хэсгийг уншдаг. Эл хэсэгт судалгааны ажлын товчлол байдаг учраас хурдан хугацаанд мэдээлэл авах боломжтой. Мөн гарчгийн хэсгээс өөр хэрэгтэй агуулгыг олж уншиж болно.  

Аливаа мэдээлэл өдөр бүр хувьсан өөрчлөгдөж буй энэ эрин зуунд шинээр хийсэн судалгаануудтай танилцах нь зөвхөн эрдэмтэн, судлаачдад л хамааралтай зүйл биш юм. Энэ нь хувь хүний сэтгэлгээний хөгжилд үнэтэй хувь нэмэр оруулдаг учраас хүн бүр танилцаж байх учиртай. Өдгөө бид урьд хожид хэзээ ч байгаагүй их мэдээллийг хурууны үзүүрээрээ товч дарах төдийд л олж чадна. Иймээс судалгааны ажлуудтай танилцаж, насан туршийн суралцахуйг бүтээцгээе. Таны олж авсан мэдлэг өөртөө болон эргэн тойрны хүмүүстээ илүү сайн ирээдүйг бий болгоход туслах юм шүү.