Оксфордын Их сургуулийн доктор Жорж Дрансфилдээр удирдуулсан олон улсын эрдэмтдийн баг хүн төрөлхтний урьд өмнө илрүүлж байсан гарагуудаас хамгийн өвөрмөц, ховор төрлийн хоёр гаргийг нээснээ зарлалаа. Манай Дэлхийгээс 1110 гэрлийн жилийн алсад орших эдгээр гаргуудыг "TOI-791 b" болон "TOI-791 c" хэмээн нэрлэсэн бөгөөд судалгааны үр дүн нь шинжлэх ухааны "Monthly Notices of the Royal Astronomical Society" сэтгүүлд нийтлэгдсэн байна.
Уг хоёр гараг хэмжээгээрээ нарны аймгийн Бархасбадь гарагтай дүйцэхүйц боловч нягт нь шоо сантиметр тутамд ердөө 0.038-0.047 грамм байгаа юм. Энэ нь бидний идэх дуртай хөвөн чихэр болон сахлын хөөснөөс ч сийрэг, өд шиг хөнгөн гэсэн үг бөгөөд манай дэлхийн нягттай харьцуулахад даруй 100 гаруй дахин бага аж.
Энэхүү сонирхолтой нээлтийг хийхэд NASA-гийн өгөгдөл дээр ажилласан сайн дурын иргэдийн оролцоо болон Антарктид дахь "ASTEP" дурангийн 8 жилийн ажиглалт голлох үүргийг гүйцэтгэжээ. Антарктидын өвлийн улиралд тохиодог олон сарын тасралтгүй харанхуй шөнийн ачаар эрдэмтэд тус бүр 11 гаруй цаг үргэлжлэх гаргуудын урт дамжин өнгөрөлтийг анх удаа газрын дурангаар ямар ч тасалдалгүйгээр, бүтнээр нь бүртгэж авч чадсан байна.
Судалгааг ахалсан доктор Ж.Дрансфилд "Өдгөө нарны аймгаас гадна 6300 орчим гараг нээгээд байгаа ч байгаль дэлхий биднийг гайхшруулсаар байна. Ийм ер бусын содон систем бүр гараг эрхсийн үүсэл гарлын нууцыг тайлахад дахин нэг алхам ойртуулдаг" хэмээн онцолжээ. Судалгааны багийнхан дараагийн шатанд "Жеймс Вэбб" сансрын дуранг ашиглан эдгээр гаргуудын агаар мандлын бүтцийг нарийвчлан судлахаар төлөвлөж байгаа юм байна.
Эх сурвалж: Оксфордын Их сургууль
Сэтгэгдэл