Зүүн Азийн эрэгтэйчүүдийн волейболын аварга шалгаруулах тэмцээний шийдвэрлэх тоглолтууд өнөөдөр АСА Аренад болж, алт, мөнгө, хүрэл медалийн эзэд тодорлоо.
Тэмцээний тав дахь буюу сүүлийн өдөр хүрэл медалийн төлөө Монгол Улс болон БНХАУ-ын шигшээ баг, аваргын төлөө Өмнөд Солонгос болон Япон улсын шигшээ багууд учраа таарсан юм.
Медалийн тоглолтуудаас өмнө Хонгконг болон Тайванийн шигшээ баг 5-р байрын төлөө тоглосон бөгөөд 0:3 (24:26, 22:25, 19:25) харьцаатайгаар Тайванийн шигшээ баг ялалт байгууллаа.
Хүрэл медалийн төлөөх тоглолтод Монгол Улсын Үндэсний шигшээ баг 3:1 (25:16, 25:22, 19:25, 25:23) харьцаатайгаар БНХАУ-ын шигшээ багийг буулган авч, Зүүн Азийн эрэгтэйчүүдийн волейболын аварга шалгаруулах тэмцээний хүрэл медалийн эзэн боллоо.
Монгол Улсын Үндэсний шигшээ баг тус тэмцээнээс анхны медалиа хүртсэн түүхэн амжилт үзүүлж байна. Манай эрэгтэй шигшээ багийн тамирчид өмнө нь 1998, 2015, 2017 онуудад дөрөвдүгээр байрт шалгарч байсан юм.
Үргэлжлүүлэн 19:30 цагаас тэмцээний аваргын төлөө Өмнөд Солонгос болон Япон улсын шигшээ багууд талбайд гарч, шийдвэрлэх тоглолтыг хийсэн юм.
Тус тоглолтод Өмнөд Солонгос улсын шигшээ баг 3:1 (40:38, 25:17, 23:25, 25:22) харьцаатай ялалт байгуулснаар энэ жилийн Зүүн Азийн эрэгтэйчүүдийн волейболын аварга шалгаруулах тэмцээний аварга болсон юм. Харин Япон улсын шигшээ баг энэ жилийн Зүүн Азийн эрэгтэйчүүдийн волейболын аварга шалгаруулах тэмцээний мөнгөн медалийг хүртлээ.
Тэмцээний медальтнууд
- Аварга: Өмнөд Солонгос улсын шигшээ баг
- Мөнгөн медаль: Япон улсын шигшээ баг
- Хүрэл медаль: Монгол Улсын шигшээ баг
Ийнхүү 5 өдрийн турш үргэлжилсэн Зүүн Азийн эрэгтэйчүүдийн волейболын аварга шалгаруулах тэмцээн өндөрлөж, бүсийн шилдэг багууд Улаанбаатар хотноо өрсөлдөн аваргуудаа тодрууллаа.
