Монгол Улс Азийн барсын жишгээр бус Чонон эдийн засгаар хөгжинө

Дэлхийн эдийн засгийн форумд 130 гаруй улс орны төлөөллүүд оролцож байна. Үүнээс 40 улс нь өөрсдийн онцлог, ёс уламжлалаа сурталчилж, хэлэлцүүлэг, гэрээ хийх Хаусыг байгуулсан. Манай улс уг 40 улсын нэг бөгөөд хоёр өдрийн дотор 3,000 орчим хүн зочилж, манай ёс уламжлал, төсөл хөтөлбөрүүдтэй танилцжээ.   

Дэлхий даяар 100 гаруй улс оронд хүрч, 200 саяас дээш үзэгчтэй байдаг Африкийн Arise News суваг мөн “Go Mongolia” Монголиан Хаусаар зочилсон байна. Уг телевизийн баг Монголд үйлдвэрлэсэн ноолууран ороолт, дээд зэрэглэлийн бүтээгдэхүүнүүдтэй танилцан, Монгол Улсын Эдийн засгийн форумын Ерөнхий нарийн бичгийн дарга Ч.Ганхуягтай ярилцжээ.   

Тус нийтлэлд “3.5 сая хүн амтай Монгол Улс хөдөө аж ахуй, ашигт малтмалаас ихээхэн хамааралтай байдаг. Гэсэн хэдий ч монголчууд эдийн засгийн олон талт ирээдүйг төсөөлж байна. Монгол Улсын Эдийн засгийн форумын Ерөнхий нарийн бичгийн дарга Ч.Ганхуяг “Чонон эдийн засаг” хэмээх нэр томьёог гаргаж, Монгол Улсын эдийн засгийн өсөлтийн стратегийг Хонг Конг, Сингапур, Өмнөд Солонгос, Тайван зэрэг “Азийн барс”-тай харьцуулан тодорхойлж байна” хэмээсэн байна.  

Монгол Улсын Эдийн засгийн форумын Ерөнхий нарийн бичгийн дарга Ч.Ганхуяг “Азийн бар улсуудын онцлог нь хямд ажиллах хүчинд анхаарлаа хандуулснаар амжилтад хүрсэн явдал. Харин Монгол Улс ийм замаар явахгүй. Бид хямд ажиллах хүчнээс хамааралтай салбаруудад анхаарлаа хандуулахын оронд бүтээгдэхүүн үйлчилгээндээ илүү үнэ цэнийг нэмэн, ард иргэдээ илүү өндөр цалинтай байлгамаар байна. Иймээс нэмүү өртөг шингэсэн эдийн засагт хөрөнгө оруулалт хийнэ. Монгол Улс Зүүн Азийн бүс нутгийн санхүү, технологийн төв болохыг хүсэж байна” гэжээ.

Эх сурвалж: Arise News