Сүүлийн үед Gen Z үеийнхэн утсаар ярих, нүүр тулж уулзах зэрэг хүн хоорондын харилцаанаас зугтах хандлагатай болжээ. АНУ-ын Wisconsin Madison их сургуулийн сэтгэл судлалын тэнхимийн профессор Мэриэллен Макдональдийн хэлснээр “бид хоорондоо чөлөөтэй ярилцах үед хүний тархины эсүүд сэргэж, хөгшрөлт удааширдаг бөгөөд суралцах чадвар нэмэгдэж, анхаарал төвлөрөлт сайжирдаг давуу талтай” гэсэн байна. Гэвч Z үеийнхэн түлхүү подкаст, TikTok, YouTube зэрэг платформоор бусдын яриаг сонсдог болсон бөгөөд энэ нь амьд харилцаанаас олж авах мэдрэмж болоод танин мэдэхүйн мэдлэгийг бүрэн орлох боломжгүй аж.
Иймд ярихаас зайлсхийх нь залуусын амьдралд сөргөөр нөлөөлж байна. Учир нь Gen Z үеийнхэн ярилцахаас татгалзах тусам тэдэнд илүү ганцаардсан, найз нөхдийн хүрээлэл багассан, болзооны идэвх буурсан зэрэг сөрөг шинж тэмдгүүд илэрч байгаа аж. Түүнчлэн АНУ-д Z үеийнхэн ажлын ярилцлагад орохдоо нүүр тулж уулзахаас аль болох зайлсхийж мессеж, чат, мэйл зэргээр харьцан ажилд орох тохиолдол цөөнгүй гарч байгаа аж. Үүнийгээ дагаад ажил олгогчид олон нийттэй чөлөөтэй харилцдаг, харилцааны өндөр соёлтой залуу боловсон хүчин олоход хүндрэлтэй болсон байна.
Яагаад ярихаас татгалздаг юм бол?
Энэ үеийнхэн ярилцахаас зайлсхийхэд цар тахал, зайнаас ажиллах нөхцөл, “helicopter parenting” буюу эцэг эхийн хатуу хяналт зэрэг хүчин зүйл нөлөөлжээ. Цар тахал залуусыг олон жил нийгмийн харилцаанаас тусгаарлаж, зайнаас ажиллах нь хамт олонтой болох, багаар ажиллах чадварыг эрс бууруулсан байна. Харин насанд хүрсэн ч эцэг эхтэйгээ хамт амьдардаг залуусын хувьд дуудлага ирэх, хүн асуулт асуух үед эцэг эх нь тэдний өмнөөс хариулдаг зан нь Gen Z үеийнхнийг дуу цөөтэй болоход нөлөөлжээ.
Гэхдээ зарим Z үеийнхэнд олон хүнтэй ярилцаад байх шаардлагагүй чимээгүй байдал нь таалагдаж байгаа бол зарим нь дээрх сөрөг үр дагавраас ангижирч хүнтэй ярилцах үед үүсдэг түгшүүр, стресс зэргээ дарахын тулд найзуудтайгаа тогтмол уулзаж ярилцах, мессеж, чат бичихээс илүү утсаар ярих, захиалга хийх, ярианы клубт явах зэргээр өөрчлөгдөхийг хичээсээр байгаа ажээ.
Эх сурвалж: The Washington Post
Сэтгэгдэл