Эстони улсын Таллин хотноо энэ сарын 7–23-нд зохион байгуулагдсан Таллины 29 дэх удаагийн “Хар шөнө” олон улсын кино наадмын (PÖFF) үндсэн уралдаант хэсэгт найруулагч Ж.Сэнгэдоржийн “Ханын зураач” (The Muralist) уран сайхны кино шалгарч, NETPAC шагналын эзэн боллоо.
Унгар, Морокко, Испани, Филиппин, Монгол, Герман зэрэг улсын 17 кино бүтээл өрсөлдсөн тус ангилалд “Сэтгэлийн зураг” бүтээл шинэлэг найруулга, уран сайхны шийдлийн төлөөлөл болсноор NETPAC байгууллагын өндөр үнэлгээг авчээ.
Ази, Номхон далайн кино урлагийг олон улсын тавцанд дэмжих зорилготой NETPAC (Network for the Promotion of Asian Cinema) шагнал нь тухайн найруулагчийн бүтээлч замналд чухал түлхэц өгдөг, нэр хүндтэй тусгай байрын шагнал юм. Энэхүү шагналын эзэд олон улсын кино фестивалиудад илүү өргөн хүрээний оролцоо, хамтын ажиллагаа, санхүүжилтийн боломжуудыг нээх давуу талтайгаараа онцлог байна.
