Анх 1882 онд гацуур модны гэрлэн чимэглэлийг зохиожээ
1882 онд Нью-Йорк хотын бизнесмен Эдвард Хиббард Жонсон гэрийнхээ гацуур модыг 80 ширхэг жижиг чийдэнгээр чимэглэж анх гэрлэн чимэглэлийг зохиожээ. Тухайн үед хүмүүс модоо лаагаар чимэглэдэг байсан нь гал алдах эрсдэлтэйгээс гадна эдийн засгийн хувьд ч хүндрэлтэй байсан учир Жонсоны энэхүү туршилт олон нийтийн анхаарлыг татжээ.
Үүний дараа 1894 онд буюу АНУ-ын 24 дэх Ерөнхийлөгч Гровер Кливлендийн үеийн хэвлэлүүд анх удаа гэрлэн чимэглэлийг ашиглан Цагаан ордны гацуур модыг чимэглэсэн талаар мэдээлснээр Нью-Йорк хотын оршин суугчид өргөнөөр ашиглах болжээ. Гэвч Америкийн алслагдмал газруудад цахилгаан хангамж хязгаарлагдмал, гэрлэн чимэглэл нь үнэтэй, суурилуулахад төвөгтэй зэрэг асуудлуудаас болж модоо лаагаар чимэглэсэн хэвээр байсан ажээ.
Эцэст нь 1903 онд АНУ-ын General Electric компани ахуйн хэрэглээнд тохирсон илүү аюулгүй, гараар утсыг нь холбож асаадаг төвөгтэй байдлыг халж ашиглахад хялбар анхны үйлдвэрийн гэрлэн чимэглэлийг худалдаанд гаргасан байна. 1940-өөд он гэхэд гэрлэн чимэглэл нь Америкчуудын гацуур модны чухал чимэглэл болоод зогсохгүй дэлхийн улс орнуудын шинэ жилийн баярын нэгэн хэсэг болон хувирчээ.
Эх сурвалж: History