АНУ-ын хаданд авирагч Алекс Хоннолд 508 метр орчим өндөртэй Taipei 101 цамхгийн оройд 90 минутын дотор ямар ч олс, хамгаалалтын хэрэгсэлгүйгээр амжилттай авирчээ.
Олс, хамгаалалтын хэрэгсэлгүйгээр өндөрт авирдаг “free solo” төрлөөр дэлхий нийтэд танигдсан Хоннолд өмнө нь байгалийн өндөр хаданд хэд хэдэн удаа авирч байсан туршлагатай. Харин энэ удаагийн түүний авиралт хотын архитектурын орчинд хийгдсэнээрээ онцлог бөгөөд илүү төвөгтэй, өндөр эрсдэлтэй нөхцөлд тооцогдож байна.
Тэрбээр барилга дээр авирах нь хаданд авирахаас ялгаатай чадварыг шаарддаг бөгөөд өндөр барилгад авирах тухай арваад жилийн турш бодож явснаа CNN агентлагт ярьжээ.
Уг авиралтыг Netflix-ийн баримтат төслийн хүрээнд шууд дамжуулалтаар хүргэж, дэлхий даяар үзэж сонирхсон байна. Хоннолд өмнө нь 2017 онд 914 метр өндөр El Capitan хаданд ямар ч хамгаалалтын хэрэгсэлгүйгээр авирч, олон улсын анхаарлын төвд орж байжээ.
Эх сурвалж: CNN
