Скүүтер, мопед, унадаг дугуйтай иргэдэд зориулсан тусгай эгнээ гаргах ажил үргэлжилж байна

2025 онд Нийслэлийн Засаг Даргын Тамгын Газраас 2026-2028 онд нийт 253 км урт дугуйн замын ажил хийхээр төлөвлөж буйгаа танилцуулсан. Тэгвэл энэ онд 78.5 км урт дугуйн зам барих нарийвчилсан зураг төслийг боловсруулсан бөгөөд Сүхбаатар дүүрэгт 15.17 км, Чингэлтэй дүүрэгт 3.6 км, Баянзүрх дүүрэгт 28.23 км, Баянгол дүүрэгт 18.74 км, Хан-Уул дүүрэгт 9.18 км, Сонгинохайрхан дүүрэгт 3.6 км дугуйн зам барих юм байна. Одоогийн байдлаар Улаанбаатар хотод нийт 101.7 км дугуйн зам байгаа ч хүн амын хэт төвлөрөл, нийслэлийн авто замын хэрэглээ зэргээс шалтгаалан дугуйн замын хүрэлцээ хангалтгүй байгаа юм.

Түүнчлэн УИХ-аас Замын хөдөлгөөний аюулгүй байдлын тухай хуульд нэмэлт, өөрчлөлт оруулж суррон, скүүтер, мопедын хэрэглээг зохицуулсантай холбоотойгоор ирэх долоодугаар сарын 1-нээс улсын хэмжээнд 18 нас хүрээгүй хүүхэд мопед, скүүтер, суррон унахыг хуулиар хориглоно. Энэхүү зохицуулалтын дагуу цахилгаан дугуй, скүүтерийн жолооч нар замын хөдөлгөөнд оролцохдоо, унадаг дугуйн замаар, эсвэл тусгай эгнээгээр зорчих ёстой юм. Улмаар Улаанбаатар хотод скүүтер, мопед, унадаг дугуйтай иргэдэд зориулсан тусгай эгнээ гаргах ажил үргэлжилж байна. 

Одоогоор унадаг дугуй, скүүтер, мопедын зориулалтын 14.6 км эгнээ байгаа бол энэ онд 31.2 км-ийг нэмэхээр төлөвлөжээ. 2040 он гэхэд нийслэлийн дугуйн замын нийт уртыг 1,677 км хүргэх урт хугацааны зорилт дэвшүүлсэн байна. Мэргэжилтнүүдийн үзэж буйгаар, энэхүү төсөл хэрэгжсэнээр автомашины хэрэглээнээс үүдэлтэй агаар, дуу чимээний бохирдол буурч, эрүүл амьдралын хэв маягийг дэмжих нөхцөл бүрдэх ажээ. 

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс