Монгол Улсын Үндэсний Статистикийн Хороо хүн амын бүтэц, шилжилт хөдөлгөөн, хөдөлмөр эрхлэлт, боловсрол, өрхийн сууцны нөхцөл байдлыг шинэчлэх зорилгоор цогц судалгааг Хүн ам, орон сууцны завсрын тооллогын хүрээнд таван жил тутамд зохион байгуулдаг билээ. 

2025 оны завсрын тооллого нь иргэдийн төрд бүртгэлтэй мэдээллийг ашиглан цахим хэлбэрээр зохион байгуулж байгаа бөгөөд энэхүү арга нь мэдээллийг илүү бүрэн, найдвартай цуглуулж, алдагдалгүй боловсруулах боломжийг олгож буйгаараа онцлог юм. Иймд Монгол Улсын нутаг дэвсгэрт амьдарч буй иргэд www.2025.mn цахим хуудас болон “E-Mongolia” системээр, харин гадаад улсад оршин суугаа иргэд www.citizen.2025.mn цахим хуудсаар хандаж, тооллогодоо хамрагдах боломжтой байна. 

Иргэд тооллогод идэвхтэй оролцсоноор өөрийн болон өрхийн мэдээллийг алдагдалгүй бүртгүүлж, улс орны хүн ам, орон сууц, нийгмийн үйлчилгээ, боловсролын бодлого зэрэгт шууд нөлөө үзүүлэх боломжтой. Цахимаар оролцсоноор иргэд цаг хугацаагаа хэмнэх боломжтой бөгөөд тооллогын үйл явцад хялбар, хүртээмжтэй оролцох давуу талтай. Мөн мэдээллийг тодруулах шаардлагатай иргэдтэй 2025 оны 10 сарын 15-наас 12 сарын 15-ны өдрүүдэд 7015-1212 дугаарын утсаар холбогдох боломжтой аж.

Хүн ам, орон сууцны завсрын тооллого нь тоо баримт цуглуулахаас гадна улсын бодлого төлөвлөлт, нийгэм, эдийн засгийн үзүүлэлтүүдийг шинэчлэхэд суурь мэдээлэл болдог тул иргэд та бүхэн тооллогод идэвхтэй оролцож, мэдээллээ бүртгүүлэхийг уриалж байна.