Эрдэмтдийн үзэж байгаагаар дэлхийн хамгийн эртний шинэ жилийн баяр Месопотамын нутгаас эхтэй аж. Ойролцоогоор 4,000 жилийн өмнө одоогийн Иракын нутагт оршин тогтнож байсан Сумер, Вавилончууд хаврын эхний сарыг угтаж шинэ жилийг тэмдэглэдэг байжээ. Тэдний ашигладаг Сумер–Вавилоны сарны календариар шинэ жил нь “Нисан” (Nisannu) сарын эхний өдөр тохиодог байсан бөгөөд энэ нь байгаль сэрж, тариалангийн шинэ мөчлөг эхэлдэг цаг үе байв. 

Энэ баярыг “Akitu” буюу зарим эх сурвалжид “Zagmuk” хэмээн нэрлэдэг бөгөөд шинэ жилийн өдрөөр хаандаа хүндэтгэл үзүүлж, бурхдад тахил өргөх, нийгмийн эв нэгдлийг илтгэсэн бэлгэдлийн ёслолууд өрнөдөг байсан байна. 

Хэдийгээр Месопотамын энэхүү баяр өнөөгийн бидний 1 дүгээр сарын 1-нд тэмдэглэдэг шинэ жилээс хэлбэрийн хувьд ялгаатай ч утга агуулга нь ижил. Тэдний хувьд ч шинэ жил нь шинэ боломж, аз хийморь, эрүүл энх, амьдралын цоо шинэ мөчлөгийг бэлгэдсэн ховор нандин цаг мөч байжээ.