Монголын анхны энтертайнмент технологийн “MET Expo 2025” амжилттай зохион байгуулагдлаа

Тайз, дэлгэцийн уран сэтгэмж, технологийн шинэ шийдлүүд болон сүүлийн үеийн тоног төхөөрөмжүүд хосолсон Монголын энтертайнмент технологийн салбарын хамгийн анхны арга хэмжээ болох “MET Expo” энэ сарын 3, 4-ний өдрүүдэд M Bank Arena-д амжилттай зохион байгуулагдлаа.

Хоёр өдрийн турш үргэлжилсэн энэхүү арга хэмжээнд энтертайнмент арга хэмжээ зохион байгуулахад шаардлагатай тайз, дэлгэцийн шийдэл, гэрэлтүүлэг, дууны систем зэрэг техник, технологийн шилдэг шийдлүүдийг танилцуулснаар энэхүү салбарын хөгжил, уран бүтээлийн гүйцэтгэл хэрхэн дараагийн түвшинд гарч буйг оролцогчдод бодитоор харуулсан нь онцлог байв. Контент бүтээгчид, стримерүүд, инженерүүдээс гадна тайз, дуу, гэрэлтүүлгийн техник хариуцсан мэргэжилтнүүд, эвентийн зохион байгуулалтын багууд мөн энэ салбарт хөл тавихаар зорьж буй оюутан залуус зэрэг урлаг, технологид хайртай 1,700 гаруй хүн MET Expo-д оролцсон нь энтертайнмент технологийн салбарын өсөлт, ирээдүйн боловсон хүчний бэлтгэл, залуусын идэвх, сонирхлыг илэрхийлж байлаа. 

Экспогийн танхимд дэлгэгдсэн шинэлэг төхөөрөмжүүд, тайзны шийдэл, дуу, дүрсний технологи, хөгжмийн тоног төхөөрөмж зэргийг оролцогчид өөрийн биеэр туршиж үзэхийн зэрэгцээ салбарын уулзалт, туршлагатай мэргэжилтнүүдийн сургалт, зөвлөгөө, хэлэлцүүлэгт хамрагдан, мэдлэг, ойлголтоо тэлэн энтертайнмент технологийн ертөнц дэх ирээдүйн чиг хандлага, хамтын ажиллагааны шинэ гарц, карьерын боломжуудыг ч олж харсан нь арга хэмжээний онцлох хэсгийн нэг байв.

Арга хэмжээнд энтертайнмент технологийн салбарт үйл ажиллагаа явуулж буй тэргүүлэгч компаниуд нэгдэн оролцож, өөрсдийн бүтээгдэхүүн, үйлчилгээг танилцуулсан нь салбарын хамтын оролцоог нэг алхмаар урагшлуулсан чухал үйл явдал байлаа.