Итали улсын Милан болон Кортина д'Ампеццо хотуудад зохион байгуулагдах өвлийн 25 дахь удаагийн Олимпын наадамд оролцох Монгол Улсын баг тамирчдын ёслолын болон чөлөөт хувцсыг олон нийтэд танилцууллаа. Уг хувцсыг үндэсний үйлдвэрлэгч Гоёл Кашмер компани урласан бөгөөд загварын шийдэлдээ 13-15 дугаар зууны Их Монгол Улсын үеийн түүхэн өв соёл, нүүдэлчдийн ахуйн элементийг тусгажээ.
Ёслолын дээл нь салхи хүйтнээс хамгаалах мөөрөлжин зах, элэг тэвэрсэн битүү энгэр, хөдөлгөөнд саадгүй хормойн оноо зэрэг түүхэн уламжлалт шийдлийг хадгалсан байна. Гоёл Кашмерын зүгээс эдгээр загваруудыг дээд зэрэглэлийн монгол ноолуурыг торгоор эмжиж, эвэр угалз хээг хатган бүтээсэн нь ёслол хүндэтгэлийн шинж чанарыг илэрхийлжээ.
Мөн тамирчдын чөлөөт хувцасны загварт барууны соёлд түгээмэл ашиглагддаг уулын цанын ноосон цамцны хэв маягийг монгол гэр, ахуйн дүрслэлээр баяжуулан ноолууран сүлжмэл хэлбэрээр урласан байна. Энэхүү цуглуулга нь уламжлалт хувцсыг орчин үеийн загварт нийцүүлэхээс илүүтэйгээр, Монголын түүхэн өв соёлыг дэлхийн тавцанд дахин таниулж, нүүдэлчдийн язгуур ижилслийг сурталчлах зорилгыг агуулж байгаа ажээ.
Сэтгэгдэл