Ирэх наймдугаар сарын 5-9-ний өдрүүдэд Улаанбаатар хотод Зүүн Азийн эрэгтэйчүүдийн волейболын аварга шалгаруулах тэмцээн зохион байгуулагдах гэж байгаа билээ. Түүгээр зогсохгүй Монголын шигшээ энэхүү тэмцээнээр Зүүн Азийн бүсийн хүчирхэг багуудтай өрсөлдөж, чанар чансаагаа тодорхойлох юм.
Тасалбарыг: https://www.portal.mn/events/volleyball-8-5
Зүүн Азийн эрэгтэйчүүдийн волейболын аварга шалгаруулах тэмцээн нь энэ бүсийн үндэсний шигшээ багуудын аваргыг тодруулдаг албан ёсны тэмцээн бөгөөд багууд нь Азийн хүчирхэг төлөөллүүд байдаг.
Тэгэхээр энэ яг ямар учиртай тэмцээн юм бэ?
Зүүн Азийн эрэгтэйчүүдийн волейболын аварга шалгаруулах тэмцээн (Asian Eastern Zonal Men's Volleyball Championship) нь Азийн Волейболын Холбооны (AVC) харьяа Зүүн Азийн Волейболын Холбооны (EAVA) гишүүн орнуудын үндэсний шигшээ багууд оролцдог албан ёсны олон улсын тэмцээн юм.
Анхны тэмцээн 1998 онд Макаод зохион байгуулагдсан бөгөөд түүнээс хойш хоёр жил тутамд уламжлал болгон зохион байгуулж иржээ. Энэ удаагийн тэмцээн 13 дахь удаагийн тэмцээн юм.
Тэмцээнд тогтмол оролцдог орнуудын бүрэлдэхүүнд:
- Япон
- БНСУ
- БНХАУ
- Тайвань (Chinese Taipei)
- Монгол
- Хонконг
- БНАСАУ
- Макао зэрэг Зүүн Азийн шилдэг шигшээ багууд багтдаг.
Яагаад энэ тэмцээн өндөр чансаатай вэ?
Энэ тэмцээнд Азийн төдийгүй дэлхийн волейболын хүчирхэг төлөөллүүд оролцдог. Япон дэлхийн чансааны дээгүүр бичигддэг, Олимп болон Үндэстнүүдийн лигийн (VNL) тогтмол оролцогч, мөн БНСУ, БНХАУ нь Азийн волейболын уламжлалт хүчирхэг багуудын нэг юм. Тиймээс эдгээр улсын эсрэг тоглох тоглолт бүр нь Монголын шигшээ багийн хувьд олон улсын түвшний бодит шалгуур болж ирсэн.
Үүний зэрэгцээ Зүүн Ази нь Азийн волейболын хамгийн өрсөлдөөнтэй бүсүүдийн нэгд тооцогддог. Олимп, Дэлхийн аварга, Азийн аварга шалгаруулах тэмцээний медалийн төлөө тогтмол өрсөлддөг багууд нэг бүсэд багтдаг учраас Зүүн Азийн аварга шалгаруулах тэмцээн нь бүсийн аварга тодруулахаас гадна баг бүрийн бодит түвшинг хэмждэг чухал сорил болдог.
Бидний хувьд ямар ач холбогдолтой билээ?
Монгол Улс энэ тэмцээнийг өмнө нь 2000, 2008, 2015, 2017 онуудад зохион байгуулж байсан туршлагатай. Харин 2026 онд тав дахь удаагаа хүчирхэг багуудыг эх орондоо хүлээн авах гэж байгаа нь Монголын волейболын холбооны зохион байгуулалтын чадавх, олон улсын итгэлийг дахин баталж буй хэрэг юм.
Монголын эрэгтэй шигшээ өмнө нь хоёр удаа дөрөвдүгээр байр эзэлж байсан. Өөрөөр хэлбэл, медалийн босгон дээр хамгийн ойр ирж байсан гэсэн үг. Энэ удаад нутагтаа тоглох давуу талаа ашиглан түүхэн амжилтаа ахиулах боломж бий.
Үүнээс гадна, хамгийн чухал нь Монголын волейбол сүүлийн жилүүдэд үзэгчдийн тоо, дотоодын лигийн өрсөлдөөн, гадаадад тоглож буй тамирчдын тоогоороо мэдэгдэхүйц өсөж байгаа үед энэ тэмцээн болж байна. Ийм үед эх орондоо олон улсын том тэмцээн зохион байгуулж буй нь хөгжлийн дараагийн шат руу шилжих боломж гэж үзэж болно.
Өрсөлдөөний тухайд гэвэл…
Энэ тэмцээний өмнөх үр дүнг түүхэн цаг үеэр нь харвал хамгийн амжилттай баг нь Япон бөгөөд зургаан удаа аваргалсан амжилтаар тэргүүлдэг. БНСУ гурван удаа аваргалсан бол БНХАУ хоёр, Тайвань нэг удаа аварга болж байжээ.
Өөрөөр хэлбэл, энэ тэмцээн нь Азийн хамгийн хүчтэй волейболын шигшээ багуудыг нэг дор цуглуулдаг өндөр түвшний өрсөлдөөнтэй тэмцээн гэсэн үг. Монголын хувьд ийм багуудтай албан ёсны тэмцээнд тоглох нь олон улсын туршлага хуримтлуулах, залуу тоглогчдоо хөгжүүлэх, үндэсний шигшээ багийн бодит түвшинг үнэлэх хамгийн үнэ цэнтэй боломжуудын нэг юм.
Зөвхөн спортын тэмцээн биш
Олон улсын тэмцээн зохион байгуулна гэдэг нь дан ганц талбай дээрх тоглолтоор хэмжигдэхгүй. Шигшээ багууд, дасгалжуулагчид, олон улсын холбоод, шүүгчид, хэвлэл мэдээлэл, хөгжөөн дэмжигчдийг хүлээн авах нь тухайн улсын зохион байгуулалтын соёл, чанар болоод түвшин, спортын дэд бүтэц, олон улсын хамтын ажиллагааг харуулах боломж болдог.
Монгол Улс өмнө нь энэ тэмцээнийг хэд хэдэн удаа зохион байгуулж байсан ч үндэсний шигшээ багийн хөгжил, дотоодын лигийн өрсөлдөөн, үзэгчдийн сонирхол зэрэг олон хүчин зүйл өнөөдөр өөр түвшинд хүрээд байна. Тиймээс энэ удаагийн Зүүн Азийн аварга шалгаруулах тэмцээн нь ээлжит олон улсын тэмцээн гэхээс илүү волейбол спортоор Монгол Улс хаана явж байгаагаа бүс нутгийн шилдэг багуудын эсрэг бодитоор хэмжих боломж болох юм.
Монголын Волейболын Холбооны шинэчлэл, хөгжлийн шинэ үеийг эхлүүлж буй энэхүү тэмцээнд Хятад, Өмнөд Солонгос, Япон, Тайвань, Макао, Хонгконг зэрэг бүс нутгийн шилдэг багуудын эсрэг эх орныхоо нэрийг гаргаж, хүчтэй өрсөлдөөнийг үзүүлэх ҮНДЭСНИЙ ШИГШЭЭ БАГАА УУХАЙЛАН ДЭМЖИЦГЭЭЕ!
Сэтгэгдэл