Монгол Улсын Үндсэн хуулийн өдөр өнөөдөр буюу нэгдүгээр сарын 13-ны өдөр тохиож байна. Монгол Улс түүхэндээ дөрвөн удаа буюу 1924, 1940, 1960, 1992 онуудад Үндсэн хуулиа хэлэлцэн баталж байжээ. 1990-иэд онд Монгол Улсад улс төр, нийгмийн томоохон өөрчлөлтүүд гарснаар 1992 оны нэгдүгээр сарын 13-нд тухайн үеийн БНМАУ-ын Ардын Их Хурлаар Монгол Улсын дөрөв дэх үндсэн хуулийг шинэчлэн найруулж баталсан байдаг. Үндсэн хууль нь оршил, 6 бүлэг, 70 зүйлтэй бөгөөд Монгол Улсад нэг танхимтай парламент, Ерөнхийлөгчийн институт бүхий олон намын тогтолцоот ардчилсан хэлбэрийг хуульчлан баталгаажуулсан байдаг.
Олон нийтийн оролцоонд тулгуурласан Үндсэн хууль
Үндсэн хуулийн төслийг 1991 онд улс даяар хэлэлцүүлсэн бөгөөд 900 мянга гаруй иргэн, 7 мянга орчим байгууллага хамт олон санал бодлоо илэрхийлж байжээ. Ойролцоогоор 200 мянган хүний санал дээр тулгуурлан Үндсэн хуультай шууд холбогдох 8,000 орчим саналыг нэгтгэн боловсруулсан нь шинэ Үндсэн хууль ард иргэдийн оролцоонд тулгуурлан бүтээгдсэний тод илрэл болж байв.
Төрийн бэлгэ тэмдгийн сонголт ба шийдэл
Монгол Улсын тусгаар тогтнол, бүрэн эрхт байдлын бэлгэ тэмдэг нь Төрийн сүлд, туг, далбаа, тамга, дуулал мөн гэж Үндсэн хуулийн Нэгдүгээр бүлгийн арванхоёрдугаар зүйлд заасан байдаг. Иймд тухайн онд хийгдсэн хэлэлцүүлгийн явцад Төрийн сүлд, далбааны загварын талаар олон хувилбар яригдаж, уламжлалыг сэргээх, соёмбо голлосон шинэчлэл хийх зэрэг санал дэвшүүлж байжээ. Эцэст нь Ардын Их Хурлаар санал хураалт явуулж, өмнөх загваруудыг өөрчлөх санал дэмжигдээгүй тул зураач Ц.Ойдовын бүтээсэн сүлдний төсөл олонхын саналаар хүчин төгөлдөр үлдэж, өнөөгийн төрийн сүлд албан ёсоор батлагдсан ажээ.
Эх сурвалж: Parliament.mn
Сэтгэгдэл